مطلوب جيفارا

مش عارف ليه حاسس ان مصر اصبحت عقيمة ومش قادره تجيب واحد عنده شخصية ثوريه قياديه تقدر تقود ثورتها العظيمة ,والحقيقه انا لاحظت اننا عندنا مليون غاندي ومفيش جيفارا واحد , الحقيقه المره ان كل الشخصيات والنخب السياسية دلوقتي عايشه في دور غاندي وده شئ مينفعش دلوقتي علشان إحنا عايزين حد ثوري بزياده وعنده شخصيه قياديه بزياده وطموح جدا لدرجة ان طموحه يسبق طموح الثورة والثوار وده شئ يفتقده كل النخب السياسيه ومثلا حد يجي يقولي ما هو مثلا ائتلاف شباب الثورة ينفع قائد , اقوله انا لا علشان اولا الائتلاف يقاد ولا يقود و برضوا يفتقد نقطة الطموح وفي شخصيات زي البرادعي مثلا لكن النوع بتاع البرادعي ده عامل زي غاندي كده ثائر هادي ديه نقطه جيده علشان بتساعد علي تحليل صح للامور بس في الوقت ده مش وقت تحليل ده وقت ثورة وغضب مش وقت تفاوض وتحليل وفي النوع بتاع حازم صلاح ابو إسماعيل وده بقي عامل فيها ثوري إنما في الاول وفي الاخر بيسعي لمطالب شخصيه  وده دائما بيحاول يعمل برباجندا كبيره وينادي بمطالب ثوريه إنما وقت الجد ينسي كلامه ويخنث عهده والناس والثوار اللي كانوا وراه هما اللي يلبسوا . وفي مشكله تانيه برضوا في موضوع القياده ديه وهي ان كل اللي عندهم شخصيات ممكن تبقي قياديه ناس كبار في السن ودول تربوا علي اسلوب اطلب 10 مطالب ولو اخذت واحد يبقي كويس إنما الجيل الحالي فهو يطلب 10 مطالب ويريد 11 واقل حاجه هي ال10 اللي طلبهم في الاول لكن للاسف هذا الجيل معندوش اي شخصيه قياديه بارزة يعني مثلا كل بتوع ائتلاف شباب الثورة لما يتكلموا يقولوا احنا شاركنا زي كل الناس في الثورة إنما مبنمسلش حد غيرنا وكذلك وائل غنيم ولغاية دلوقتي يبقي الحال كما هو عليه والثورة من غير قيادة .

صرخة جيفارا يا عبيد
في أي موطن أومكان
ما فيش بديل

اربط الحزام

انا الاول كنت هكتب الموضوع عن ليه مصر مش تونس , وان انا عرفت شوية فروق بين مصر وتون ممكن تكون السبب في الفرق اللي حصل بين الثورتين , زي مثلا تعداد السكان وان هما عددهم 12 مليون , و في سبب مهم جدا لاقيته و هو التعليم فالتعليم في تونس من اكثر النظم التعليمية تقدما  ومن اسباب كده ان التعليم مخصص ليه حوالي 22% من ميزانية تونس كلها اما في مصر فإحنا بنصرف علي التعليم 2% من ميزانية الدولة , مع العلم ان الناتج القومي لتونس اكثر من الناتج القومي لمصر بكثير . ديه كانت المعلومات اللي انا وصلتلها بسهولة لما حبيت بقي اعرف تفاصيل اكثر جبت تقرير التعليم في تونس من موقع وزارة التربية التونسيه وكان واضح وفي كل النسب وكل حاجة , اما بالنسبة لوزارة التربيه والتعليم المصريه فالحقيقة انا ملقيتش غير ارقام الطلبة والمدرسين المدارس والفصول بس وغير كدة لا شئ وكمان الحاجات ده مش محطوطة علي مستوي الجمهورية كلها إنما محطوطة كل محافظه لواحدها . المهم علشان مطولش عليكوا موصلتش للمادة الكافية اني اكتب موضوع حتي عرفت انها ممكن تكون في مركز التعبئة والاحصاء ولكن لقيت اني كنت لازم اروح اشتريها الخلاصة بقي من كل الكلام ده ان انا شايف واؤمن التعلم ده قضيه قوميه ولازم يكون هو الهدف الاول في الفترة الجاية فليه منعملش زي عبدالناصر عد النكسة لما استخدم فلوس الدولة كلها لإعادة بناء الجيش وده كان ساعتها هو الهدف وما إن الهدف دلوقتي هو التعليم يبقي نعمل زي ما عمل ونضخ الفلوس في التعليم وهات وزير عنده رؤيه للنظام التعليمي في خلال سنتين يبقي عندنا نظام تعليمي متطور وقوي واي نهضة لازم تبداء بالتعليم  و انا شايف اننا لو عملنا التجربه ديه في كل مجال من المجلالت البايظه اوي هنبقي دوله عظمة في اقل من 10 سنين وفي الاخر الله , الوطن , التعليم .

لا تصالح

لا تصالح على الدم.. حتى بدم! لا تصالح! ولو قيل رأس برأسٍ أكلُّ الرؤوس سواءٌ؟ أقلب الغريب كقلب أخيك؟! أعيناه عينا أخيك؟! وهل تتساوى يدٌ.. سيفها كان لك بيدٍ سيفها أثْكَلك؟ سيقولون: جئناك كي تحقن الدم.. جئناك. كن -يا أمير- الحكم

لا تصالح قصيده رائعه طبعا لامل دنقل الشاعر العربي الكبير و انا احب اوجه القصيده ديه للمجلس الاعلي للقوات المسلحه الصراحه ان اللي المجلس العسكري عملوا في الفتره الانتقاليه فاق اللي عمله مبارك فينا في 30 سنه علي الاقل مبارك مخلاش مدرعه تمشي تدوس علي الناس في الشارع ومبارك كان عنده حجج مقنعه مش يطلع يقول ان المدرعه كانت مسروقه وبعدين لو كانت مسروقه  ديه تبقي مصيبه تانيه نرجع لموضوعنا و مبارك كان ماشي في منهج مش عمل مثلكم ماشيين شويه علي الجنب ده و شويه علي الجنب التاني يعني ساعة الضرب قلتم ان حوالي 3 ماتوا من ضباط الجيش و بعدين وزير الإعلام يطلع بكل برود يقول اصل المذيع كان متوتر طب ديه تيجي إزاي يعني يعني انا مثلا قتلت واحد لما النيابه تحقق معايا اقلهم اصلي كنت متوتر هتخلوني اشتمكوا شتيمه وحشه مع اني محترم نيجي لحاجه تانيه و هي ان انتوا عندكم اصرار علي انها فتنه طائفيه و ده مش صح ديه فتنه سياسيه الناس اللي ماتوا كانوا مسلمين و مسيحين الفتنه ضد المجلس العسكري  و إعلامه الفاسد و حكومته الضعيفه اللي مفيهمش غير الدكر الوحيد اللي استقال و هو حازم الببلاوي و انا احترمته جدا بعد موقفه ده و في الاخر احب اقول للمجلس العسكري و علي رائسه طنطاوي اللي عملها مره يعملها تاني يا طنطاوي و اتعلم من اللي قابليك بس انت خلاص متعلمتش و جبت اخرك معانا هنعملها تاني و انت المسؤول  

التعليم هو الاساس

طبعا كل الناس كارهه ايام الملكيه علشان الفساد وعدم وجود حريات وكل ده انما لو بصينا للملكيه من ناحية التعليم هنلاقي انها كانت فتره راقيه ومتميزه في التعليم حتي اللي كانوا بيمسكوا وزارة المعارف (اللي هي زي التربيه والتعليم عندنا دلوقتي) كانوا ناس ادباء و مثقفين زي مثلا طه حسين وعلي مبارك وكذلك ابو الليبراليه في مصر سعد زغلول وايضا احمد لطفي السيد و هو اول من ترجم لارسطو و ده اثر علي التعليم لأن كلهم كانوا ناس ليهم رؤيه في التعليم و طوروا و ده عمل اذدهار في المستوي الثقافي و العلمي للمصريين المتعلمين و الفتره ده كان فيها نهضه في الفنون ولكن وزراء التعليم بعد ثورة 23 يوليو كلهم لم يملكوا رؤيه محدده لتطوير التعليم و كان كل ما يؤهلهم ان بعضهم كان معاهم دكتوراه و لكن كلهم كان يميزهم ولائهم للنظام و كمان اللي منع اننا نشوف ناتج عصر التعليم الجميل هو سياسات نظام عبدالناصر واللي جم بعده منعت ظهور و كلام اي حد مش مؤيد لنظام عبدالناصر وطبعا معظم الناس المفكرين و اللي عندهم رؤيه ضد الحكم العسكري اللي فضلنا تحت رحمته 60 سنه و اكبر مثال لكده هو وزير من وزراء التعليم في عهد عبد الناصر قال رأي مختلف عن رأي عبدالناصر في اجتماع و بعد الاجتماع بيوم فقد منصبه والموقف ده يوضح ان اللي احنما وصلناله النهارده من فقر وجهل واميه وفساد مش محصلش نتيجة 30 سنه من حكم شخص واحد ولا حتي 60 سنه من حكم نفس النظام المشكله ان النظام مع وجود وزراء جواه انما اغلبهم يا إما مبيفهمش و اللي بيفهم فيهم ميقدرش ياخد الحريه في التصرف في اختصاصات منصبه لو في اختلاف في الرأي مع الشخص المنفرد في الحكم وده مكنش موجود ايام الملكيه ومش معني كده ان انا مع الملكيه  وضد ثورة 23 يوليو بالعكس انا ضد الملكيه قلبا وقالبا انما ده ميمنعش ان كان فيها حاجات كويسه وكمان انا ناصري جدا بس ده ميمنعش اني اشوف حاجه حاجه وحشه في عبدالناصر ونظامه  وبرضو ميمنعش اني شايف ان سياسات عبدالناصر في بعض الحاجات هي اللي عملت واحد زي المخلوع  و وصلتنا اننا نعمل ثوره ضده  علي فكره اني اقبل النقض في حاجه انا مؤمن بيها ده شئ متعلمتوش في المدرسه ومن نظام التعليم التعليم الحالي اللي مينفعش يبقي تعليم للناس متحضره انما انا اتعلمت ده من الثوره وفي ميدان التحرير ونفسي الناس اللي مسؤلين عن التعليم يفهموا العبره من ده و نتعلم بيها و نفسي نرجع للزمن اللي المثقفين و اللي عندهم رؤيه يمسكوا التعليم .

إرضي بقليلك

طول عمري نفسي افهم القناعه بالظروف اللي المصريين عايشين بيها و حتي اللي انا كنت عايش بيها و ملقتش تفسير للموضوع ده غير كلمة "إرضي بقليلك"  كلمه ديه مبدأ مشيعليه ناس كتير و للأسف كلهم عاشوا مش مبسوطين و تعساء علشان محدش فيهم بيطلب اللي هو عايزه وبيقطنع باللي بياخده مهما كان قليل و مبيجبلوش حتي ابسط حقوقه و علشان في ناس من حوالي 60 سنه في ناس فهموا الموضوع ده واستخدموا الموضوع ده علشان ياخدوا من المصري ابسط حقوقه و يقمعوه و طبعا في ناس عرفوا يستخدموا ده في خدمة البلد من وجهة نظرهم انما في ناس اللي عملوه ميخدمش البلد ولا اي حد من اي وجهة نظر غير نفسهم زي مبارك ورجالته و في ناس استغلوا ده علشان يسرقوا عرق المصري زي رب عمل يشغل الموظف بتاعه بال18 ساعه في اليوم و يديلوا 100 جنيه مثلا او مدرس يشرح للطلبه ميشرحش للطلبه غير نص الدرس علشان ياخدوا معاه درس و اللي ميخدش معاه ويسألوا مشرحتش الباقي ليه يقولوا كويس ان انا بشرحلك اصلا ولو مش عاجبك خد درس او موظف بياخد رشوه علشان يديك حقك وانت ساكت و ... و ..... و .... ولو علي الامثله مش هتخلص بس علي فكره اللي بيرضي بقليلوا دايما بيبقي مذلول بالقليل اللي خدوا لكن انا خلاص مش هرضي بقليلي تاني و هاخد حقي كامل و هعمل اللي عليا كامل كمان و علي فكره اللي بيرضي بقليلوا ده دايما غلبان و ضعيف ومذلول والمصري مش كده ولا عمره ما كان كده ممكن يكون في فتره ضعف و سكت علي حقه لكنه في الاخر بيثور علي الظلم و بياخد حقه كامل و علي فكره احنا خلاص اعلمنا نتكلم إزاي ومش هنسكت تاني و لو حد حاول يظلمنا تاني هنوريه احنا بنتكلم إزاي و اكتر من الكلام كمان و لكم في مبارك عبره .

أشكرك يا إسرائيل

بالفعل أشكرك يا إسرائيل مع انك عدوي الاول , مع انك لست اكثر من نمله استطيع دهسها بسهوله , اشكرك يا إسرائيل علي وحدتنا فبعد ان كنا في حاله من الفرقه عدنا ايد واحده في وجهه المعتدي , إن ضرب إسرائيل للحدود كان اشبه بنداء الإستيقاظ الذي افاقنا من الغمه الذي كنا فيها فبعد ان كنا في اشد حالات الفرقه ,اجتمعنا كلنا كيد واحده يجمعنا حبنا للوطن وكرهنا لإسرائيل , طبعا هناك إختلاف وحيد بين الناس الان فهناك من يشك ان كل هذا مجرد تمثيليه لينقض المجلس العسكري علي الحكم و هناك من يقول ان هذا بسبب الثوره وقرب تسليم السلطه إلي هيئه مدنيه و بدايه حكم ديموقراطي في مصر و هو ما تتخوف منه إسرائيل و ايضا هناك بعض الجوانب السلبيه مثل عرقلة المحاكمات و عرقلة مسار الثوره لكن كل هذا يعد بلا اهميه بجانب وحدتنا

هل يزور المجلس العسكري الإنتخابات ؟

طبعا ده سؤال غريب جدا و ليه يعمل كده ؟ بس ممكن نقول علشان الإسلامين او علشان يسيطر علي مجلس الشعب اللي جاي و علي الدستور اللي جاي علشان يزود دور القوات المسلحه في الدوله و السياسه خصوصا ان في كلام اتكتب في الموضوع ده و ان كان في خلاف بين المشير طنطاوي و الرئيس المخلوع علي النقطه ديه اما بالنسبه لشواهد الوضوع ده فهي انه المجلس العسكري يرفض تماما فكرة تطهير القضاء و بذلك اللي هيشرف علي الإنتخابات اللي جايه هم نفس القضاه الذين زوروا الإنتخابات في العصر البائد مع اني اعتقد اننا ما زلنا في هذا العصر بل عصر اوحش كمان و الدليل محاكمه المدنين امام القضاء العسكري واخرهم اسماء محفوظ وكمان الحكم دلوقتي عسكري مش مدني و المجلس بيتعامل مع الشعب بصفته العسكريه و علشان مع ان السياسين عنما ينتقدوا المجلس يبنقدوه بصفته ىالسياسيه المدنيه لكن المجلس العسكري للاسف لا يفصل بين الصفتين لذلك عندما يتم انتقاده بعتبر هذا نقدا للموئسسه العسكريه كامله ولكن كيف نقنع المجلس بالفصل بين صفتيه ؟ هذا هو السؤال .

ليه مبنتعلمش ؟؟

أول حاجه احب اعتذر ان انا بقالي فتره مبكتبتش حاجه من قتره بس للأسف المناخ العام مش مشجع اوي ان اي حد يكتب حاجه مع ان في احداث كثيره و منها الكويس بس مع انا مش متفائل و نخش في الموضوع وهو احنا مش اتفقنا ان السبب في تراجع الثورة ان احنا سيبنا الميدان ولما نزلنا 8يوليو و اعتصمنا قلنا علشان نرجع روح الثورة بس فجاءه لقينا القوي السياسيه اياها مطلعه بيان بيعلنوا تعليق الاعتصام  زي ما يكونوا معاشوش في ال6 شهور اللي فاتوا و كل ده بحجه اعطاء الفرصه للحكومه الجديده وانا مش عارف ليه حاسس اني سمعت الكلام في اخر فبراير لما قالوا ندي المجلس العسكري فرصه و شوفنا الحال وصل بينا لفين لكن لما نزلنا التحرير و الحال ابتدا ينصلح فضوا الاعتصام و احنا داخلين علي رمضان  الناس هتتلهي في الصيام و الفطار والمسلسلات و مع ان في ازمه اقتصاديه لكنها موجوده وزي كل سنه و الحقيقه المجلس العسكري مكدبش خبر ومع أول يوم في رمضان فض بقية الناس اللي كانوا معتصمين و اغلبيتهم من أهالي الشهداء وطبعا كل القنوات جايبين المسلسلات و محدش عرف خد بالوا ان الاعتصام اتفض غير بعد الهنا بسنه والقوي السياسه طبعا مش هتعمل حاجه علشان هما مشيوا من الميدان و طبعا المجلس العسكري هيقول عليهم بلطجيه زي ما عملوا في 9مارس و في الاخر طلع رامي عصام كان في الميدان و اتعذب يومها و مع قدوم محاكمه مبارك اللي مش عارف ليه حاسس اني مش هاشوف مبارك في القفص و غالبا هبعلنوا وفاته قبلها وكله مشغول برمضان فمحدش هيدقق في الموضوع  أو هيقولوا رمضان شهر مغفره وتسامح و هنسامحه والخطاب الديني هيشتغل عموما اتمني ان ربنا ينصرنا في رمضان و يحمي مصر من الخطط و المؤامرات و يرجع حقنا .

كريم حسن                                   

قصيدة الخال عبدالرحمن الأبنودى .. لسه النظام مسقطش كاملة

واحده من اروع قصائد الشاعر الكبير عبد الرحمن الابنودي بتوضح حالنا دلوقتي و انا مش هطول عليكوا اقروها بقي 

(1) أول كلامي ..أهني الشعب أبو الثوار اللي خلق ثورته..تحت الرصاص والنار اللي فرض كلمته ..عالحاكم الجبار ساقهم طابور للعدالة ..للندالة عقاب فضح جدميع اللصوص ..ورا شيخهم الكداب طلع حاميها حراميها ..طلع نصاب الملعونين – لا شماته – في كل لوح وكتاب و ع العدالة البطيئة ..لينا ألف عتاب فساد بيلضم رئيس بوزير علي نواب اترصو كما سور ..حجب عن مصر أي نهار ************** (2) سرقو دوا المرضانين ..سرقو حليب الطفل القصد ..سرقو الوطن ..ورمولنا إحنا التفل سلبوا الوطن نضرته..فاكريننا حزمة هٍبل فجأة الوطن بص شاف ..إن البدن ..عاري وإنه سلعه ما بين بايع ..وبين شاري تعبت شعوبنا ..تواري الشكوي ..وتجاري غير تدعي ع المجرمين ..وتشهد الباري والطفل حتي ان ضحك ..فالضحكة طياري باعوا البلد حتة حته ..ووزعوا الباقي وفجأة صوت الوطن علي ..ودش القفل ************* (3) يادي الجثث يوم ما علي سطح الفساد عاموا والشعب ينعي ولاده ..ويبكي أيامه ولا حد طاله عقاب ..أو فيه كبير لامه بين الكبير والعصابة ..سيبها مستورة في يومها ساب من غرق ..راح شجع الكورة بلدنا في حداد وشفنا الست مسرورة اليأس صبغ الحياة ..روح مصر مكسورة حاصروها من كل ناحية ..ضلموا الصورة باعوا الوطن في النهار ..بدون مايخبوا وسلموا للعدو ..المفتاح ..وأختامه ************* (4) ابن البلد شاف بلاده حفلة من موتي وشاف مصانع ابوه حته ورا حته طبخوا ..وحطو أكلتها ف طبق فته شاف مصر ..مصر العزيزة تنام علي الأرصفة وتخوض حروبها الجديدة لأجل ست ارغفه كل اقتصادها اتنهب ..لبس طاقية خفا والجهل قال للمرض : "إلعب ..عليه الشفا" كل اللي سابه أبوها ..في لحظتين اختفي وإذا جبنا سيرة الوطن ..يتمقلتوا الرايقين أما المجالس فكانت حفله للعتَّه !! *************** (5) هربت فلوس مصر خارج مصر .. في أوروبا حمي مالنا منا .. وسف .. وسفت النخبه وإن قلنا جعنا جعنا .. مافيش غير جملته الخايبه " أجيب لكو منين ؟" ساعتها يسقفوا اللؤما طيارة مخصوص بتنقل صاحب العصمة ياخويا كتر السفر..من غير ولا مهمه أتاريه مسافر يا سيدي يسجل البصمة والناس في تعاستها بتدور علي اللقمة واللقمة سافرت أوروبا ..هناك لقي أهله واحنا ف بلدنا استوينا وعشنا كالغربا *************** (6) عجبتنا ضلتها ..واستهترنا بالحكام صدقنا أوهامنا ..والأيام بقت أعوام واللي ملخلخ ثبت ..وتًّق رباط وحزام عملنا غيه للفقاري لما هرب العيش ؟ من تاني رجع الفقير يلبسها فل وخيش قلنا ..وهل صحّي قولنا نومة االدراويش؟ حققنا بالصوت "فلان يسقط" و"غيره يعيش" ؟ إيه تعمل الكلمة ف أبو سلاح وشرطة وجيش ؟ والحلم كداب ..ياخدنا لفوق ..يسيبنا لتحت قوللي في سوق الحقيقة بقينا نسوي كام ؟ ************** (7) مين دول يا اهل الوطن؟طلعو منين ؟قولوا ما خلوا شئ للوطن ..حتي طبق فوله وعٍلي أنين أهلنا..هل مره سمعولُه ؟ باعوا تراث الجدود..فراعين علي إسلام وان يسألوهم يردوا : كل حاجة تمام ليهم جيوش ف الدعاية وخبرا ف الإعلام نهبوا ثروات كبار ما تكفيهاش أحلام الطيبين ..الجمال..حرامية ..ده اسمه كلام ؟ ونخروا تحت الوطن حفرة ..ورا حفرة ونصبنا شاهد كبير ..ونمنا في طوله!! ************* (8) وف لحظة فعلا تليق بينا ..نفضنا الهم ولا همنا م الرصاص ولا من بحور الدم الثورة ملت الميدان والكيف في حجم الكَم ملايين في أوركسترا ..جوه الميدان تعزف هتاف ..كإنه ريح مجنونة ..وبتكشف الست ..شايلة ابنها ..وسط الجموع تهتف والصوت كإنه بيشرب دم من ينزف هل شعبنا ده اللي كان من لحظه متكتف ؟ آه يا بلادي الجميلة لما تبقي انتي ملايين راششها الوطن علي أرضه كيف تتلم ************* (9) دي ثورة ..وللا الشروق غمر ميادينها؟ أعلام دي وللا أشرعه لصواري سفاينها ؟ وشوف من امتي انتهت ..ولسه سامعينها ياه ع الجنون اللي خلي الرقصة جماعيه ملايين في قلب الميدان .. والدنيا حريه صابرين علي مرها ..ف الطايبه والنًّيه من غير أساتذه ..البشر جمعتهم النِّيه يتوحد الصوت ..بروق تضوي..مدويه الثورة سهلة ..فأرجوك ..لم ألغازك إحنا اللي مالكينها مش انتو اللي مالكينها !! *************** (10) زحفت جيوش الشباب – يا مرحبا يا مصر زأرتي في الكون ..زئيرك ..شق بطن العصر ملايين بتهتف وبتزلزل حيطان القصر وآه يا بلدي العجيبة ..قولي لي جيتي منين؟ إنتي دي وللا مش إنتي ؟لقيتي صوتك فين؟ في كل وجه ابتسامة نصر حي مبين والغنوة تصدح وتصبح خلق بالملايين ميدان صرخ ف البلاد ..ردت عليه ميادين مصر اشرأبت وعبِّت صدرها ثورة عرفت ف لحظة زمن ..إزاي تعود للأصل !! *********** (11) وجوه أضائت..وجوه مسودة كالدخان وبالخصوص اللصوص .. حرامية الأوطان من باعوا كنز البلد ..لعدوها الشيطان سلبوا الفقير لقمته ..سِوا ف المدن ف الريف وكتفونا سنين ..وحليلهم التكتيف مصر الضمير للأمم .. نزلو عليه تجريف وكنا وسخين لكن هما "شريف"و"نظيف" وكنا شهدا الوطن ..دلوقت شهدا رغيف أما حَمُوله يا بنت الغيه ..يا ست الكل وازاي ف طلعة ميدان ..اتهردم الطغيان ؟ ************** (12) الثورة قطر النجاة داخل في مواعيده عِلي الهتاف بالشعار ..لم كفوا ترديده والخادم المنحني المذلول ..نفض سيده إتشققت أرض مصر الحرة ..يا خيي طِولِت إيدين الغلابه تشاشي وتحيِّي للشعب صوت لما ينوي يدوِّي ..بيدوِّي فلتعلنوا الفرحه وتظاظوا كده زيي اللي مجرد سيرتهم ..تئذي ..وتعيي باعوا الوطن ف العلن ..جبنا الوطن تاني آدي الوطن ف الميدان ويدنا ف إيده ! *********** (13) لولا إن مصر دي ما بتضيعش ..كان ضعنا إزاي لحبة لصوص ..نخِّينا ..وخضعنا ؟ وازاي دارينا الإهانه ..تحت تواضعنا ؟ كإننا ماحناش احنا ..والتاريخ كداب والدنيا تنظر إلينا بكل الاستغراب علي صبرنا المفتري ..ع الحاكم الدِّحلاب واحنا ..لا بنسألو ..ولا لازمنا جواب عارفين عيوبنا وأصل القصة والأسباب عشناها ف الانتظار ..ومن انتظار لانتظار و ف يوم لقينا النهار وسط الميدان .. مَعَنا ! ************** (14) لكن اللي ماعرفش مصر يقول كده ..واكتر تبان هزيلة قتيلة ..يوماتي ..تتدحدر مايعرفوش ان خلف الغيم بلد يقدر يضرب بكفه يفتح ألف باب للغد يطلع ربيعه ف قلب البرد أو ف الشرد ملايين .. مايتحسبوا لا بالجوز ولا بالفرد فجأة من الشوك تطل عليك عيون الورد فجأة ..ويعلا الغنا .. يملا الفضا والأرض ومصر هيه ..لكن حتقول "ماهيش هيه" لولا ف عينيها الهرم والسد والأزهر ************** (15) كام ألف طاغى فى أفريقيا نهب شعبه يلهف مصادر حياته... و يدعى حبه الشعب يشقى و هوه و أسرته يعبوا ! يرشى الصحافة.. و ساكن وشه فى الشاشة هوه ووراه شلته.. شاكوش و كماشة يقول لده ""إنت بيه".. و يقول لده "باشا" يحن على أمته؟. يرعى الفقير؟ حاشا على كتفه كيلة نجوم.. و هو أومباشى و بلحم أطفال بلاده الغضه يتعشى و لا حد فى شعبه كله غلط فى يوم حبه ************** (16) أما إذا شعبه قام و قبض عليه باليد فالمال –بدون ضمته- مايصرفوهشى حد طب لو عيمى و اتبكم.. من كل خرم اتسد من كل ده نابك إيه يا شعب غير الفلس؟ و تعمل إيه ببصمته بالصوت ما دام اتخرس؟ حكاية طبعا عجيبة.. و اسألوا اللى اتقرص شفنا كصير الأسود  فى لحظة صاروا بسس و تضيع أمانى الشعوب فى أى مستقبل و البنك يلهف: لا خدنا.. و لا الحرامى خد! ************** (17) إحنا اللى قالوا علينا مرضى بمكاننا لو صح عزم البشر لنردهعا جنه دى ثورة شوفوا احنا فين و فين يا ناس كنا مايهمناش الفلوس و لا هربوها لفين لو كنا واخدينها جد نردها فى شهرين خانوا الوطن.. الخيانة قبلة الخاينين ديابة.. بنيبان طوال.. عصابة الملاعين لابسين بدل غالية بس تدارى إيه أو مين؟ و لو التباطؤ تواطؤ.. إحنا مش نايمين قتلوا شبابنا بلا رحمة.. لكن بكرة دم الشهيد راح يكون الزيت لمكننا!! ************** (18) تار الشهيد اللي ضحى .. في رقابيكم دمه ما زال فوق رصيف غسلينه بإيديكم اللي اترمي في بوابات الموت .. يحميكم إوعوا في هوجه الكلام .. دم الشهيد تنسوه ويسرقوه منكم .. ياما التاريخ سرقوه ماهيش حكايه صوره ولا غنا تغنوه ولا في هيصه الفرح ممكن عقولكو تتوه أمَّه اللي بتنوح عليه .. وتقول : (ضنايا هاتوه لو هيه شايفاكوا قرّبتوا من احلامه ماكانتش تحزن .. حتلقاه حيّ في عينيكم !! ************** (19) لو عن سقوط النظام .. لسه النظام مسقطش! إيه الفروق بين زمان و الوقت؟.. ما تفرقش!! لخمونا فى الريم ... و مين فى بحرهم .. ما غرقش؟ ماكانش قصد الشباب.. كام أسم أو أعداد يعنى ( الرئيس و المدام و الشلة و الأولاد).. لأ.. يوم ما هتف الجميع "يسقط" بكل عناد و رفعوا راية الميلاد فى قلب لاستشهاد كان المراد.. هدم كون... كله خداع و فساد يزيلوا بنيان قديم.. و يقيموا صرح جديد لسه القديم زى ما هو ف وشنا.. ماوقعش!! ************** (20) نفس الوجوه القدام لسه محاصرانا متربصة بالأمل.. و بدم شهدانا و بيلعبوا ف كل حين ميت لعبه تعبانه ما هو اللى خد ع الخداع يحيا يموت.. غادر ثورتنا أعجاز.. و تعجيزها من النادر لا حيطفوا نارها و لا صوت بحرها الهادر وانا زى شعبى الأصيل.. الملهم.. الصابر على قد ما بابان هزيل .. على قد مانا قادر شايل فى صدرى الوطن.. و ف قلبى مفتاحه الثورة ما همدش لسه صوتها جوانا!! ************** (21) و فجأة تطلع (أيادى سودا) من بينا تغير الطعم و اللون..تقفل الجنه فى عز تفاؤلنا..  تطفى النور فى فرحتنا تشقنا ألف فرقة بألف وش ووش صوتها نحيب لا لغربة.. تزعق تزوم و توش فاكرينا لسه جداد على أكتشاف الغش و مدبرين إن فرحة شعبنا ما تعيش و بشاعة الوش ترعب مصر مصر تكش يا عم فارقنا شوف لك " بيت يكون طابخ" لسه ما جاش الفرح.. دى ليلة الحنة..!! ************** (22) الثوره مش حكر .. لا ملكك و لا ملكي ملك اللي يومها سند صدره علي السونكي و اللي الرصاصه شالت عينه ولم يبكي ملك الشهيد اللي فدا غيره بنيران و رصاص رسم خريطه الوطن .. بالدم وبإخلاص والّا انتو صدقتوا ما ماتوا وراحوا خلاص ؟ ورجعتوا تاخدوا الجمل بما حمل يا ناس تتقلبوا ع الثوره حالا تقلبوا الإحساس يكفي تآمر .. و لعب زمان من تاني مانا كنت علي نيتي .. صحيتوا ليه شكى ؟!! ************** (23) و جاى تفرق ما بيننا.. تشقنا نصين.. و تقول مسيحى و مسلم.. أنت عايش فين؟ زين لك الجهل تقسم شعبنا شعبين إسمع يا صاحبى و أقولهالك بعلو الصوت إسمعها منى و قول: "قال" – بكرة لما أموت- أهى "مصر" دى "يونس" اللى عاش فى بطن الحوت لا تموت.. و لا من يغير فيها قلب و صوت وفرحاجاتك.. بضاعتك فينا مش حتفوت يالل مخبى الأفاعى تحت باطاتك من كتر ماحنا اتقرصنا.. تعبت التعابين!! ************** (24) أما اللى فتحوا السجون.. بيقصدوا الترويع هم اللى خانوا الوطن و القصد مصر تضيع طلقوهم الأفاقين.. و عصابة التطبيع فيه بكرة يوم جاى بخساير و بمكاسب و الشعب دايما فى فى معركة الحقوق غالب أما اللى سلب الحياة و مازال بيتكالب و قصده يرهبنا تانى بمنطقه الخايب الثورة شايفاه.. و ساعة الحسم يا اخواننا الثورة لا تحابى مين.. و لا تقبل الترقيع!! ************** (25) و الا اللى طالع علينا.. من الشقوق طاشى كما عش النمل اتفلت عينيه مشايفاشى و كاره الدنيا.. و انا كارهنى ع الماشى! دلوقتى طالع يكفر كل زول صالح يكره حلا الدنيا.. يعشق طعمها المالح قال يعنى إجنا الأونطة.. و حضرته الفالح و فى عداوته لدود.. يكره ما يتصالح عامل على الجنه شغل و رزق و مصالح نهاز فرص.. رافع الراية لفوق خالص نسى أنه كان ضدنا فى الثورة.. و ماجاشى!! ************** (26) الثورة كالزحلفة.. ولاكنها ثورة كإنها لعبة ولعبناها فى محاورة.. كسبنا دورة.. وغيرنا كسبوا ميت دورة و إن جيتوا للجد .. قدم الثورة مشلولة الثورة .. لازمها ثورة اقوى من الأولى ده احنا ضميرها .. و ضميرها بيفهم الفولة هدية بنقدموها لأمنا الغولة؟ تعبنا .. رحنا نشوف ناس غيرنا مسئولة دم الشهيد اللى هز الدنيا تحت وفوق بعناه بحبة كلام.. مايستروش عورة ! ! **************     (27) لا هو انت فاكر الزمن تانى يعود للخلف؟! لاهو انت فاكرها ترجع او تفوت الصف؟! جربتو اولادها ما بين قتل وما بين خطف شايله حمول التاريخ كتفها اللى ما كل والشعب شوفته بعينك فى الصبر مالوش حل تفتكره مات بين ايديك وتقوله "يا ريت ولعل" ويذلو فيه اللئام ابدا ما يوم ينذل انتو شربتو العسل ..وهو شرب الخل عاوزين تخونوه خونوه ..انا بس بأحذر دى مصر يابا..دى مصر اللى ما حواهاش وصف!! ************** (28) واللعب داير كما هوه.. كأنه مفيش.. ليلة ميلاد اللهب..ليلة نزول الجيش. لسه الاباطره فوق دايسين على الحرافيش. لسه الضمير متقسم..وبره غير جوه واللعب داير يا صاحبى زى ما هوه الباطل اللى ضعف .. قوى وزاد قوه لسه عيونه مراقبانى انا وهوه واخدنى على مركبه..يرمينى فى النوه الثوره فين زى ما تكون الشموس ساحت والغدر زاحف على ابن البلد بشويش. ************** (29) افتح لهم باب سجونك..يسقط السجان واطلق شباب خذلتهم فى الضهر م الميدان وافلح فى السجن اللى خان ..عندك فلان وفلان من يقلع الزرع من حوضه.. يموت فى الايد قول للى سرقو الامل وسرقو لبس العيد تانى السجون والحديد ؟ فادكم بايه الحديد؟ هل وقف الثورة والا عطل المواعيد؟ نكسر القيد ونصحى نلاقى نفس القيد عاوزين سياسه جريئه وواضحه زى الشمس معانا فى الثوره ولا نغير العنوان؟ ************** (30) والا اللى كانو دلاديل فى ديول لاسياد جايين يطفو الفرح ويقتلو الأمجاد لشباب دفعو التمن..طوابير لاستشهاد لا هو انتو بالاجر جايين تقتلو الثورة؟ هى دى شئ يتقتل يا هبل بمؤامرة؟ والا دى نيران فى بوص تطفوها بالأجرة؟ مين الغبى اللى جمعكو وسوق الفكرة؟ لازم تخونو الوطن وتقتلوا بكره عصابات خيانة الوطن ولائها لاسيادها واحنا الولاء للوطن..فى الحزن والاعياد! ************** (31) شوف الجحافل تعافر..قصدها.. ترجع من بعد فشل(الدخان.. والميه..والمدفع) ويا بلطجى..ويا عواطلى..اطلبو ..ندفع مش مال ابوهم..ده مال اهلى ومال اهلك. نهبو سنين اهلنا..واهلنا تهلك. قالو عليهم فلول..كداب مين قالك لأ جيش ومتنظمين لابديين وناويين لك بينامو بعدك..وبيصحو يرتبو قبلك دول عندهم مال وأتباع ..عندهم خبرة يمكن فى سوق الخساسه الخبره اليوم..تنفع!! ************** (32) ياللى حاكمنى..ما صدقت انى صدقتك يومها احميت بى..وانا اتداريت فى دبابتك وفرحت غنيت هتفت وطرت..وكتبتك!! الثوره دى ثورتى.. سنابلها من خيرى.. وانت فى ساعة الحوار تخلطنى مع غيرى ريحك مصره..أتوه فى السرب عن طيرى جايين سوا تسرقو ميدانى.. وتحريرى وبيك..بغيرك..حقول يا مركبى سيرى شعللنا احنا الوطن وغيرنا بيطفوه زنادى-صدقنى-مش محتاج لسبابتك!! ************** (33) ضاعت معالم قصيده..لسه ما اتكتبتش. واغانى لون الصباح البكر..ما اتغنتش.. وسكك لبكره فى ضل الثوره...ما اتسلكتش ليه عندى احساس رهيب بأديكو فى جيوبى. دخلت اصلى..وجيت مالقيتش مركوبى... تتجاهلو حسناتى..تتعاملو مع عيوبى وكأنما الثوره..اكبر ذنب فى ذنوبى؟ وانا ثورتى وجهتى.. فى شروقى وغروبى دى رجعتى شروق وبروق وصحبة ورد لكن ورودها على أعوادها.. ما اتقطفتش!! ************** (34) سامحينى يا ام الشهيد..ما جبتلوش حقه.. أبنك - عريسنا - اندفن ورصاصته فى حلقه والرب عارف وشايف ما جرى لخلقه!! ابنك شهيدى..خلق عيدى..ورحل صامت وزاميله واصلو لحد الغمه ..ما غارت وجات حكومه ورا حكومه تانى وتالت وصب اموره الرهيبه..المجرم الفالت!!. واحنا نصرح بضعف يشمت الشامت ما فضلش غير صوت وليدك فى الفضا الواسع صرخ فى وش الضلام-ساعة الرحيل-شقه!! ************** (35) إخضر تانى الشجر يومها.. كإنه ربيع و فى قلوب الغلابة اتفجرت.. ينابيع و اللى إشترى "بكره" بالدم استحالة يبيع!! و الثورة أبدا ما خلفت يوم.. مواعيدها صوت مصر فى نبضها.. و النيل فى وريدها وواقفة بتزغرت اللى رجع لها عيدها.. ثورة.. مواعده القدر و الشعب مواعدها.. فازاى و حاة النبى قوللى حتخمدها ؟ جدودنا ماتوا فداها.. جيل يسلم جيل تعواريخ حقيقية.. مهما عافرت.. مش حتضيع!! ************** (36) بان اللى بان.. و الأدان.. ما كانش برانى تعبنا عجن و خبيز فى الكانى.. و المانى يا مصر قومى استردى ثورتك.. تانى تايه ما عارف حبيبى مين من خصمى دول أجبرونى أفرط حتى فى إسمى دخانة الشك سودا و عالية و بتعمى فمين بيطفى ليلاتى الضى فى حلمى؟ إن كانت خايف فعلا زينا على مصر إبعد عن اللى بيهدم.. و احضن البانى!! ************** (37) هل كنت عاوز انقلاب واحنا عملنولك؟ رجعنا شرعيتك..وهتفنا لوصولك؟ ما فضلش غير الميدان..عاوز نسيبهولك؟ أظننا عرفنا سكت مصر..وطريقها من بعد طول العطش بل الامل ريقها كان الشهيد رمزها..بريئها وبريقها لو بحرمكم طامى عامى .. ما يغرقها فأزاى تفرقها يا عشمان بتفريقها؟ اوعى تقلب اشعارى بعيونك الشك لأه ..اعتبر ده جواب..وانا كتبتولك!! ************** (38) و انت اللى دافعت عنى ف عركة التغيير بكره حتقتلنى بإيديك فى ميدان التحرير كشر بأنيابك السودا.. بلا محاذير رافع نداك للجهاد.. و يفط آيات الرب لكن و قلبك عتم مفيهش شىء يتحب ناوى على قتلنا.. خصومك ولاد الكلب عارفك ما تكرهش فى الكون قد كلمة شعب و قد(مصر) اللى ياما فى عرفكم.. تتسب قاريك و حافضك أنا.. و انت قارينى كمان نكنس دروب الوطن تفرشها بالمسامير!! ************** (39) إن كنتوا فاكرينا راح نسكت ما عادش سكوت ما عادش حيلتنا فيكى يا مصر.. غير الصوت و الا انتوا مبتعرفوش إن ف سكوتنا الموت؟ إبقى ميزان عدل.. إلا العدل يا مولاى إن مال قلبه معاه قوم اعدله وياى دى ثورة مش لعبة تمشى على هواك و هواى إحنا منعنا سؤال الليه و فين و ازاى و لو نسينا فى يوم.. ضميرنا مش نساى خليك خكيلة مظلة ع الجميع بالعدل أحسن صريح الكلام.. و الا احسن المسكوت؟! (40) إحنا حماة الوطن فى السرا والضرا واللى يحابى الفساد راح ينطرد ..بره.. الثورة حالفة لتحكم فى بلد حرة و مهما كان اللى بيطبطب على الفاسدين الثورة ملهاش عينين اتنين .. لها ملايين و مادام ضمير الوطن عينكوا مؤتمنين إوعوا تسيبوا مصيره فى يد ناس تانيين و إوعوا تستهونوا بغضبة الثايرين هموا معانا نعدى فوق جسور الود ومن مرارة اللى فات نخلق جمال بكرة ! ! ************** (41) ويا شعبى ياللى انت طالع م الضلام للنور اصحى لكل متحنجل وراك.. بيدور دى ثورتك جايه لجلن .. تجبر المكسور حقق فى كل الكلام اللى بيتقالك .. ماهى للحقيقة وشوش اتعب لها تبان لك وابعد عن اللى باعوك من قبل.. أحسن لك تحت الوشوش فيه وشوش أصحابها ناويين لك عاوز الحياة تبتسم؟ بتقوللى: "إنصحنى"؟! أجمل نصيحة أقدمها اسمها (الدستور)

ولو عايزين تسمعوها بصوته خشوا هنا

نفسي اتعلم

هو عيب إن انا يبقي نفسي اتعلم تعليم محترم زي الدول المتقدمه والمحترمه و ابقي بنافس خريجيها و التعليم مش بس حفظ و معلمومات , التعليم هو انك تبقي قادر تجيب المعلومه حتي لو انت مش عارفها و التعليم هو تقبل رأي الأخر حتي لو مختلف عن رأيك بالإختصار التعليم هو انك تعرف تحصل المعلومه والحقيقه ان التحفيظ (أنا ارفض اني اسميه تعليم) في بلدي هو عباره عن كتاب بتحفظه و خلاص  و يبدو ان مفيش نيه لتغيير هذه السياسه العقيمه اللي مبتعملش حاجه غير انها بتطلع جيل معندوش القدره علي تعلم العمل و الحل انه يحفظ مجموعه من الخطوات زي ما تعود طول عمره ينفذ بيها الشغل ولو واجهته مشكله مبيعرفش يتصرف و هو نتاج التعليم المصري اللي المفروض ان هو مجاني بس علشان تعلاف تنجح لازم تاخد دروس خصوصيه بمبلغ كبير و حتي لما تاخد شهاده و تشتغل مبتعرفش تجيب المبلغ اللي اتصرف علي تعليمك إلا بعد عشرات السنين و الحقيقه ان انا لما بصيت للناس اللي بتحاول تجد حلول بديله للتعليم المصري زي الثانويه الإنجليزيه IGCSE اغلب المصرين اللي بيخشوا النظام ده بيجيبوا درجات عاليه جدا لدرجة انهم ممكن يبقوا الأول علي العالم في بعض المواد و انا لاحظت ان اللي بيتفوقوا اوي كده نوعان النوع الأول هو شخص بيبقي ذكي جدا و اول لما بيلاقي نظام تعليمي يساعده علي استخدام ذكائه بيبدع فيه اما النوع الثاني فده بيبقي تشبع بالتعليم المصري لنظمه لدرجة انه بيحفظ المواد صم و ده بينجح في المواد النظريه بس و في التطبيق العملي مبيعرفش يعمل حاجه

بمناسبة موضوع التعليم ده انا لقيت انهم غيروا الموازنه اللي مكنتش عجباني و عملوا موازنة تقشف و علي حد علمي المتواضع فأنا اعرف ان السياسة التقشف بتستخدم علشان نعمل نهضه في شئ معين فبنقلل الإنفاق فبقيت الحاجات و بنضخ اموال في الشئ ده إنما احنا في موازنة عملنا التقشف في الصحه و التعليم و بقا نصيبهم من الموازنه اقل من اللي كانت عليه ايام النظام السابق و بعد كل ده لما قالوا هيعملوا تعديل وزاري مجابوئ سيرة وزير التربيه و التعليم .......... و عجبي.

           كريم حسن

أين كنتم ؟

بعد مرور حوالي 6شهور علي تنحي الرئيس المخلوع و كل القوي السياسيه من بعد التنحي مبيعملوش حاجه غير انهم يتخانقوا في الأول نعم ام لا للإستفتاء و بعديها دوله مدنيه ولا دينيه و بعديها الدستور اولا ام الإنتخابات اولا و طول ال6شهور دول نسيوا  ان النظام لسه مسقطش و ان الرموز بس هم اللي مشيوا و فالحيين بس كل ما تحصل حاجه يطلعوا بيان و خلاص كده و نسيوا الشعب و سابوا المجلس العسكري والحكومه يلعبوا بينا و وصلنا للحال اللي احنا فيه و لسه حالا افتكروا ان النظام لسه مسقطش و لازم ننزل يوم 8يوليو علشان نسقطوا فاحب اوجه الأول رساله لكل القوي السياسيه و هي صباح الخير و صح النوم بس السؤال ان انتوا كنتم نايمين فين يعني الحاجات اللي كنتوا بتعملوها ده اهم من الثوره اللي خلصتكوا من الظلم و القهر و القمع  و انا شايف ان انتوا واجبكوا ان انتم تكملوها و انا الحقيقه فقدت ثفتي و احترامي لأغلب القوي السياسيه لأنها اهتمت بأمور غير جوهريه و دلوقتي مش وقنها وده بدل الإهتمام بالأمور المهمه و علي رأسها استكمال الثوره و اسقاط النظام  والمشكله انكم كنتم عارفين ان الثوره لم تكتمل و كنتم ماليين الجرائد و البرامج في التلفزيون ان الثوره لم تكتمل بس للأسف معملوش حاجه و بس انا هاعمل علشان كده انا نازل يوم 8 يوليو .

قالك طاهر

طبعا انتم مش فاهمين مين طاهر ولا أي حاجه من العنوان علشان كده يا ريت تخشوا هنا علشان تعرفوا مين طاهر.

طبعا بعد ما قرأتم الموضوع ده و اللي مقراش و قال اقرأ في الاخر يقرا علشان مش هيفهم من غير لما يقرا.

أنا الحقيقه لم أكن انتوي ان اكتب في المواضيع ديه خالص لكن لما الموضوع يتكرر كثير كده يبقي مينفعش اسكت و متكلمش و الحقيقه لو بصيتوا كده علي موقع البديل هتلاقوا مش أقل من 20 حالة تعذيب الشرطه للمواطنين , و كلهم بعد الثوره و هنا في سؤال يطرح نفسه و هو يا إما الصحفيين بتوع جريدة البديل خيالهم خصب و موارهمش حاجه غير انهم يتبلوا علي الشرطه يا إما الشرطه بتعاقب الشعب علي انهم عملوا ثوره ؟؟؟

أنا الحقيقه هختار الإجابه التانيه لإن أنا مش هافترض حسن النيه تاني لأن افترضناها مره و التانيه لكن مش كل مره بقي يعني احنا مش هبل ولا هما كمان ملايكه بالعكس دول شياطين ويمكن كمان اسوء من الشياطين بس علي فكره انا مش بعمم لأن هما فيهم الكويس و المحترم بس للأسف اللي طاغي عليهم و اللي ظاهر هما السيئين و الفاسدين و انا علي ما اعتقد ان جهاز الشرطه ده محتاجه تطهير شامل و اللي يقول صعب يبص لتجربه جورجيه اللي الفساد عنهم وصل لأنه كان مبدأ في التعامل إلا أنهم في خلال 8 سنين طهروا جهاز الشرطه بالكامل و علشان تتعرفوا اكتر علي التجربه ديه خشوا هنا او هنا .

الحقيقه ان فرعنة الشرطه ديه سببها انهم حاسين بالهزيمه بعد الثوره و عايزين يرجعوا هيبتهم اللي بقالها 30سنه متكسرتش و اتكسرت يوم 25 يناير و انا شايف انهم بيعملوا ده علشان يخوفونا و يحسسونا انهم برضوا عندهم ايد قويه و بتعرف تضرب وتعذب كويس و المشكله ان ده بيجي بأثر عكسي لأن ده بيعمل غضب شعبي فالناس تغضب علي الشرطه و يعملوا زي ما عملوا يوم 28 و29 يونيو قدام وزارة الداخليه و انا شايف ان وزير الداخليه كمان يتحمل جزء من المسؤليه لأنه لو مبيحاسبش الضباط المسؤلين عن التعذيب يبقي أو علي الأقل يوقفهم عن العمل لحد ما يتحقق في القضايا ديه يبقي في مصيبه والراجل ده مش عارف مهم منصبه أو مش عايز يعم شغلوا و لو بيحاسب يبقي تقع المسؤليه ساعتها علي المسؤل الإعلامي في الوزاره لأنه مبيصرحش عن اللي بيحصل و بكده يبقي بردو وزير الداخليه مطالب انه يحاسبه علشان كده هو بردو بيعمل غضب شعبي و لو وزير الداخليه متصرفش يبقي رئيس الوزراء يحاسبه ولو محاسبوش يبقي رئيس الجمهوريه اللي بيقوم بدوره المجلس العسكري يحاسبه و كل ده لازم يكون معلن علشان الشفافيه المفروض شئ اساسي بعد الثوره ولو محدش من دول عمل أي حاجه بقي و ده اللي حاصل علي ارض الواقع يبقي فيه خلل ولازم منسكتش عليه و نتحرك ضده لأننا معملناش ثوره علشان كرامتنا تتهان والشرطه تعذبنا تاني في الأقسام .

                                                  كريم حسن

شهور الغموض

بعد حوالي 5شهور ونصف من غضب المصريين و ثورتهم في الخامس والعشرون من يناير والحقيقه انا افضل اني اسمي الفتره ديه شهور الغموض لأن من وقت التنحي فيه ناس شغاله من خلف الستار و بتحرك الصوره في مصر و لو حللنا الموضوع هنلاقي ان من اول استقاله احمد شفيق و تولي عصام شرف رئاسة الوزاره والحقيقه تولي عصام شرف ده لوحده لغز كبير لأن عصام شرف ده طول عمره راجل الحكومه و عضو في لجنة السياسات في الحزب الوطني والغريب انهم قالوا ان عصام شرف قاد مظاهره من الجامعه لميدان التحرير و ان ائتلاف شباب الثوره هما اللي اختاروه و الحقيقه ان اللي قاد المظاهره من الجامعه هو الدكتور عبدالجليل مصطفي و السؤال هنا مين اللي قال للشباب علي عصام شرف وبعدين في أكثر من صحيفه كشفوا ان عصام شرف متورط في قضايا فساد و استيلاء علي اموال و نسب ابحاث لنفسه ومش هو اللي عمله و النائب العام أغلق التحقيق في كل ده مجامله لرئيس الوزراء !!!!!!!!!!! إزاي يعني هو في كده ؟؟

أنا شايف انه في واقعه زي ديه لازم يمشي النائب العام و رئيس الوزراء نسيبنا من الموضوع ده و نبص لأختيارات عصام شرف في حكومته و طبعا اغلبية اختياراته كانت من رجال الحزب الوطني و الحكومه و النظام السابق و انا الحقيقه شايف كمان ان الحكومه ديه حكومه ضعيفه و حتي لو الوزراء دول ماشيين بما يرضي الله فأصلا قراراتهم لا تنفذ يعني اللي حصل في مسرح البالون و التحرير في 28 و 29 يونيو ده فضيحه بكل المقاييس بالنسبه لتعامل الداخليه و الإعلام كله وده أدي إلي اننا دلوقتي محدش عارف اللي حصل بجد و الحاجه الوحيده اللي متأكد منها و ده من خلال الفيديوهات هي ان الشرطه تعاملت بشكل قمعي مع المتظاهرين و اهالي الشهداء واللي من فتره و المجلس العسكري و الحكومه اعتروهم رسميا بلطجيه و المصيبه اصلا ان المجلس العسكري و الحكومه عندهم في امن الدوله كشوف بأسماء البلطجيه و هم قادرين علي القبض عليهم بسهوله و نخلص من فيلم البلطجيه و ده برضه بيعكس حالة الغموض اللي بتكلم عاليها و الغموض ده نفسه بينعكس برضه في المحاكمات اللي بتجري صباحا لقتلة المتظاهرين من الشرطه و بالليل يرجعوا وظائفهم عادي و اكيد دول و هيحاولوا بحكم وظائفهم الضغط علي اهالي الشهداء و المصابين علشان يتنازلوا عن القضايا وبالفعل حصل الموضوع ده و في ناس استجابت ليهم و ناس رفضت و المصيبه بقي ان بعد كل ده و لسا في ناس قاعدين يفولوا المجلس العسكري هو اللي حمي الثوره و ناس بتدافع عن عصام شرف وحكومته و الناس دول انا احب افول لهم يعنس انتم مستنين ايه تاني يحصل علشات تتأكدوا انهم بيسرقوا الثوره ؟؟

و في نقطه كمان عايز اقولها و هي بالنسبه للقنابل الجديده اللي القنبله منهم ب40 دولار و اللي اخطر بكتير من القنابل القديمه و علشان تعرفه مدي خطورتها خشوا هنا وانا دلوقتي بأتسائل يعني الحكومه غنيه اوي علشان تروح تجيب قنابل ب40 دولار انتاج سنة 2011 و قاعدين يقولوا في ازمه اقتصاديه و بيجوعوا الناس الغلابه لما خلوهم يدعوا علي الثورة و يشتموا فيها ؟ والمستفذ انه بعد كل ده و لما روح اقول لأهلي عايز انزل التحرير يقولولي لأ علشان القنابل و صدري (أصل أنا عندي حساسيه شديده في صدري من زمان ) و انا ارجوا اي حد يقرأ المقال ده يتضامن معايا و يكلم اهلي يقول لهم يسبوني انزل .

                                                                          كريم حسن

اللي حصل في ميدان التحرير ومسرح البلون

الحقيقه انا كان نفسي اكتبلكم اللي حصل في الميدان و مسرح البالون بالتفصيل لكن للأسف انا معرفش ايه اللي حصل و اي حد يقولك انه عارف اللي حصل كذاب لأن حتي اللي حضر الموضوع مفهمش اللي حصل و الحقيقه ان الفصل في ده يرجع للإعلام سواء خاص او حكومي فهو بيضللنا و بيوصلنا انصاف حقائق و ده سببه حاجه من اثنين و هي إما هما مش عارفيين يعملوا شغلهم يا إما مطواطئين مع الفلول و الثوره المضاده و مجموعة الأشرار الوحشين و اللي الإعلام مفاهيمنا ان هما البعبع المسؤل مع البلطجيه عن اي حاجه بتحصل في البلد و وفقا للإعلام برضو ان الثوار برضوا بقو بلطجيه ووحشين وانا دلوقتي عندي سؤال للإعلام و هو مين في مصر دلوقتي مش بلطجي او ثوره مضاده او فلول او عدو الثوره ؟ و في سؤال مهم تاني و هو مين هما البلطجيه دول ؟ و انا في اعتقادي الشخصي ان احنا معدناش بنعرف نفرق مبين الناس الفقراء او البيئة او السرسجيه و البلطجيه اللي بجد و المشكله ان السرسجيه دول منهم اعداد كبيره من الشهداء هما كانوا من اسباب نجاح الثوره من الأول و دلوقتي احنا قلبناهم بلطجيه !!!!!!!!!!! نرجع لموضوع الإعلام و انا هفترض يحسن نيه و هبل انهم مش عارفين يعملوا شغلهم وده يرجع لأنهم متعلموش يعملوا شغلهم في الجامعه و المدارس وده يرجع لسوء عمله التعليميه في مصر الحقيقه انا لما سألت الناس ليه مبيتكلموش في التعليم دلوقتي قالوا علشان تطوير التعليم محتاج فلوس كتير وعلشان نجيب فلوس محتاجين اقتصاد قوي علشان يبقي عندنا اقتصاد قوي محتاجين ناس دارسين اقتصاد كويس و علشان نجيبهم محتاجين تعليم كويس ويه الدايره اللي عايزين ليها حل و بالنسبه لموضوع التحرير بما إني مش عارف اللي في التحرير دول بلطجيه او ثوار و مش عارف هما عايزين ايه فأنا بأعلن ان انا مش فاهم و ناوي انزل اعتصم في الميدان علشان اطالب بحقي اني افهم بس عموما الموضوع الصراحه شكله مريب و في حاجه غلط والحقيقه انا مش مطمن لأي حد من اللي بيتكلموا دلوقتي مش عارف ليه بس حاسس ان الموضوع فيه حاجه غلط علشان كده قررت تأجيل اعتصامي في التحرير لحد ما اشوف الدنيا هترسي علي ايه و في الاخر انا بأعتذر علشان المقال ده غير منظم و فيه لخبطه كتير وده لأني انا متلخبط و مش فاهم

                                                        كريم حسن

ليه نتعلم

ليه نتعلم ؟ سؤال سئلتوا لنفسي كتير اوي خصوصا وانا قاعد بذاكر بس الحقيقه طول الفتره اللي فاتت مكنتش بالاقي إجابه مقنعه علشان كل الإجابات بتتلخص فإني بتعلم علشان ابقي حاجه مهمه في البلد و اطورها و افيد المجال اللي هتخصص فيه بس الحقيقه ان مفيش حاجه من الكلام ده بتنطبق عليا لان أنا كنت بتعلم علشان العائله قالوا لي اني لازم اتعلم فأنا بتعلم علشان ارضيهم و هخش جامعه و اتخرج علشان الاقي وظيفه محترمه علشان اتجوز فالحصيله من الليله ديه كلها اني بتعلم علشان اتجوز بس بعد الثوره اكتشف ان فيه حاجه اسمها مصر و لازم اتعلم علشان افيدها و احسنها و ان انا مسؤول قدام نفسي و قدام البلد علشان افيدها بس في المقابل لازم البلد كمان تصرف عليا و توفر ليا تعليم كويس بس المشكله ان مفيش ولا تعليم عدل ولا يحزنون و المصيبه الأنقح من كده ان انا طالب في التعليم المصري طالع الصف الثالث الإعدادي و بقالي حوالي 8 سنين بدرس لغه عربيه و مع ذلك ساعة الاستفتاء علي التعديلات الدستورية لما جيت اقرأ الدستور مفهمتش منه اي حاجه و ده لأن مناهج اللغه العربيه مفيهاش اي حاجه عن المصطلحات السياسيه ونفهم من كده ان اللي حط المنهج مكنش عايزنا نشارك في السياسه و الغريب كمان اني اكتشفت اني معرفش ايه هو الدستور ده اصلا و ده لأن في منهج الدراسات الاجتماعيه اللي قعدت احفظ فيها 5سنين مفيش حاجه توضح ايه هو الدستور و ده بيأكد ان التعليم عندنا منفصل و بعيد كل البعد عن الحياه العمليه و الواقع و ده السبب الاساسي في البطاله لأن خريجين التعليم المصري معندهمش اي فكره عن الشغل بيتعمل إزاي فصاحب الشغل بيبقي قدامه اختيارين انه يشغل خريج التعليم المصري و يصبر حوالي سنه عقبال ميتعلم الشغل او يجيب خريج التعليم الاجنبي و الجامعات الخاصه و في خلال شهر يبقي اتعلم الشغل و طبعا صاحب الشغل يختار خريج الجامعه الخاصه و ده كان عرض لجزء لا يتجزء من مشكلة التعليم في مصر .

                            كريم حسن

التعليم اولاَ

في الفترة الاخيرة كل الجدل و الكلام علي حاجه واحده و هي الدستور اولا ولا الانتخابات البرلمانيه اولا و الموضوع ده عليه جدل كبير و تقريبا كل الكلام عليه و من كام يوم طلع شاب وطني اسموا محمد ابوالغيط و كتب مقال علي الفيس بوك اسموا "الفقراء اولا يا ولاد الكلب" و انا بالمناسبه ديه بقول التعليم اولا و الحقيقه موضوع التعليم في مصر يعد من الكوارث و اللي يحب يتعرف علي تفاصيل الكارثه يقرا كتاب "ثورة المهمشين للتطوير التعليم" و ده كتاب للكاتب الشاب مصطفي ابو سليم و بيتكلم عن التعليم في مصر و مشاكله بالتفصيل و كمان الكاتب بيطرح حلول جاده لهذه المشاكل و انا بعد ما خلصت الكتاب ده (و الحقيقه انا قريته كله في يوم واحد ) حسيت بمزيج من اليأس علشان كم الفساد و الإهمال اللي وصلها التعليم في مصر بس برضوا مع وجود القليل من الامل لوجود حلول و يمكن تنفيذها بسرعه لكن الكارثه اللي بجد هي ان بعد الثورة محدش اتكلم عن التعليم ولا الاحزاب ولا المفكريين السياسيين ولا اي حد و ده في حد زاته معناه انهم مش شايفيين ان ده له اهميه جوهريه و ده لوحده مصيبه لانه اساس نهضة و تطور اي شعب هو التعليم و اعتقد كمان ان الموازنه العامه لما طلعت و محدش اتكلم عن نسبة التعليم المثيره للسخريه (11%) و انا علي ما اعتقد بما أني لسه في التعليم فانا من حقي اطالب بتعليم متماشي مع الثورة اللي عملناها و النهضة اللي مستنينها و مينفعش يجيبوا وزير تربيه و تعليم شارك في افساد التعليم لأن أي حد مسك وزارة التربيه والتعليم في العهد البائد افسد في التعليم وكمان انه يطلع و يقول ان مفيش تغيير في المناهج غير بعد سنتين علشان الكتب اتطبعت !!!!! متتبرعوا بيها لجمعية رساله و تجيبولنا كتب جديده بمناهج معدله بدل المناهج الفاسده اللي النظام الفاسد حطها واللي مفيهاش غير حشو الدماغ ولا انتم بخله و مستخسرين فينا كام مليون يعني ؟ و الأنقح من كده ان انتم بنتطالبونا اننا نخترع ونبدع و نسابق طلاب الدول المتقدمه و انتم غير مراعيين تماما انهم بيتعلموا علشان يطوروا و يحسنوا من نفسهم و بلدهم انما احنا بفضل سياستكم العقيمه بنتعلم علشان الوظيفه و اظن ان الجمله السابقه بالإضافه لكتاب الدراسات الإجتماعيه لأي مرحله في مصر يدعمنا و يوضح ان التعليم في مصر يحتاج إلي وقفه و حالا و اي حد يقول ننتظر  لغاية مالدنيا تهدأ و الوضع يستقر و بيعدين نتكلم في المواضيع ده احب ارد عليه و اقول له ان كل دقيقه بنضيعها بنضيع فرصه جيل فتعليم كويس .

                            كريم حسن

الموازنه العاليا أوي

لما لقيت كل الناس في التلفزيون و البرامج بيتكلموا علي الموازنه العامه و لاحظت كام حجه كده غريبه جدا الحاجه الأوله انهم بيقولوا في عجز في الموازنه و الغريب و انا كنت الكلام ده فبل كده ان فب حاجه اسمها الصناديق الخاصه و ديه فيها 1272 مليار و لو سددنا ديونا اللي هما 1200 مليار هيتبقي 72 كليار نسد بيها عجز الموازنه والغريب ان الصناديق الخاصه ديه مدخلتش الموازنه من اساسه و ارجوا من الاستاذ سمير رضوان يقرا الكلام ده و نفترض حسن النيه و ان هو مش عارف و احنا بنعرفوا الحاجه التانيه اللي لاحظتها في الموازنه هي ان نسبة التعليم من الموازنه 11% بس وده يوازي حوالي 55مليون جنيه وده شئ مفزع لأننا دلوقتي المفروض عايزين نعمل نهضة و تطور والمفروض ان ده يبدأ بإصلاح التعليم اللي كان بيفسد طوال ال30 سنه اللي فاته و انا كطالب شايف ان التعليم اللي بتعلمه غير صالح لأي إنسان و لو رحنا بصينا علي ميزانية التعليم في دول تانيه زي انجلترا مثلا هنلاقي انهم في سنة 2010 صرفوا 88.3 مليار جنيه استرليني و لو هتقولي انجلترا دوله عظمي نروح لدوله زي ماليزيا هنلاقي انهم في 30.1 مليار دولار و ديه دوله المفروض مش من الدول الغظمي فالحقيقه انا عايز اعرف هو الاستاذ سمير رضوان مبيتكلمش مع الاستاذ احمد جمال الدين موسي وزير التربية و التعليم اللي اعلن في برنامج بلدنا بالمصري مع الإعلاميه ريم ماجد انه في خطط بالفعل لتطوير التعليم لكنه محتاج فلوس و علي الاساس ده المفروض يلاقي الدعم من الاستذ سمير رضوان و الغريب انه بعد إعلان الموازنه السيد وزير التربيه مصرحش بالإعتراض ولا جاب سيرة الموضوع اصلا المهم اعتقد اني بتكلم بواقعيه لما اطالب بتعديل الموازنه بالأخص نسبة التعليم و زياده مصروفات التعليم لعلي الإقل 10مليار جنيه كبدايه و انا اعتقد اني كده مراعي الازمه الاقتصاديه و كل الظروف اللي البلد بتمر بيها و ارجوا من ربنا ان حد يقرا الكلام

كريم حسن

الشعب المصري غير مؤهل للديموقراطيه

طبعا اي حد هايقرا الكلام ده علي طول هيقول عليا فلول و حزب وطني و من النظام القديم لأن ديه كانت النغمه اللي بيرددوها كل رموز النظام و اخرهم اللواء عمر سليمان المهم احب اقلكوا اهدوا عليا شويه و اسمعوني لحد الاخر بس الموضوع كل اللي فيه مش ان الشعب المصري جاهل او مبيعرفش ديموقراطيه او انه غير متحضر لسامح الله إنما الشعب المصري فيه اكتر من 45% تحت خط الفقر ودول اكيد يقدروا يحسموا اغلية مجلس الشعب لو الانتخابات شرسه و دول اغلبيتهم لو اتعرض عليهم فلوس او اكل مقابل اصواتهم هيقبلوا مش علشان هما خونه و مش خيفين علي البلد بس علشان هما عايزيين ياكلوا وده حق مشروع لكل الناس و يبقي في الوضع ده مينفعش نعمل اي انتخابات غير لما نحسن وضع الناس ديه اقتصاديا و كمان في مشكله و هي ان الشعب المصري طول ال30سنه اللي فاتوا كان بعيد عن السياسه و في الفتره اتغيرت المصطلحات و كل حاجه فالشعب دلوقتي محتاج توعيه و علشان كده انا شايف الحل في حاجتين الحاجه الأوله ان بدل ما كل الخبراء السياسيين يعملوا اجتماعات و يطلعوا في التلفزيون و مناقشات وكلام كبير و حاجات كتير احنا مش فاهمنها انهم ينزلوا الشارع و يفهموا الناس علشان الناس لما تختار تختار صح و حاجه هما عارفينها و ميحصلش زي الاستفتاء لما قالوا نعم مع الله و لأ مع الكفر المهم الحاجه التانيه هي التعليم و انا شايف انه من سنه رابعه يعملوا ماده زي الدراسات الاجتماعيه (اللي انا شايف انها مجرد حشو دماغ ) و يسموها ثقافه سياسيه و تعلم الطلبه السياسه و يبقي ليها مناهج و مقرر و لو حصل ده اقدر اقول ان الشعب المصري هيبقي احسن شعب في العالم بيمارس الديموقراطيه بس للأسف في الفتره الانتقاليه ديه مينفعش نطالب بالديموقراطيه و الحوار و ده لأن اللي بيديرها هو المجلس العسكري و طبيعه الحياه العسكريه هي الديكتاتوريه و الاوامر و النفراد بالرأي و مهما كان اعضاء المجلس العسكري فهما في الاول و في الاخر عسكر فمينفعش نطالبهم بشئ هما معندهمش فكره عنه وده يفسر حاجات كتير منها ان المجلس بيطلع القوانين من غير حوار و بياخد كله مع بعضه سواء كانوا ثوار او بلطجيه و كله محاكمات عسكريه بس لازم نحط في اعتبارنا انهم مبيعرفوش يتعاملوا غير كده

كريم حسن

قال حكومة ثوره قال

بعد جلسة تفكير عميقة اخدت كام قرار كده وده بعض مقولت لنفسي هما الشهداء احسن مني فإيه فأنا قررت ماخفش و اقول رأي بصراحه فكل الناس و أي حد أي كان منصبه فمن أولها كده محدش يزعل و يعني لو متكلمناش دلوقتي هنتكلم امتي ؟ اولا احب اجيب شويه في سيرة الشرطه و خصوصا جهاز الأمن الوطني اللي انا الصراحه خفت ليكون هيتعامل بإحترام بس اللي حصل لسلمي الصاوي ورانا الأمن الوطني بيتعامل إزاي كويس أوي و للي ميعرفش اللي حصل لسلمي الصاوي يخش هنا علشان يعرف المهم احب اهنئ جاهز الأمن الوطني علي صرمته و انه مصبرناش كتير و عرفنا علي طول احنا بنتعامل مع ايه ؟ و اكد لنا ان امن الدوله لسه موجود مع تغيير المسميات بس و نسيبنا من موضوع الأمن الوكني و نتوجه لللواء منصور العسوي وزير الداخليه اللي اكد انه مفيش عجز في الضباط  ولذلك مفيش نيه لتعيين خريجي الحقوق كضباط و لكن انا احب اسأله سؤال واحد وهو طالما الضباك كتير و ربنا كارمك كده إيه السبب في الإنفلات الأمني وإيه السر في ان كل مالشرطه تنزل نسمع عن ومواطن اتقتل و اتعذب في قسم و ليه القيادات اللي بيتحاكموا لسه في اشغالهم و محصلش لحد دلوقتي أي تطهير في الداخليه و بكده نوصل لأستنتاجين ملهومش ثالث الأول هو ان الراجل ده فلول و من رجالة العادلي او انه راجل تعبان مش عارف يسيطر علي الوزارة و في الحالتين الحل الوحيد هو الإقاله و ديه مسؤلية عصام شرف و إذا منفذهاش يبقي بكده هو مؤيد لللواء منصور العسوي بيعمله و بكده لازم يمشي هوا كمان والحقيقه الحقيقه انا شايف ان التشكيل الوزاري بتاع عصام شرف متناقض جدا و يتضح ده فأنه جاب وزير تضامن اجتماعي اشتراكي و هو الدكتور جوده عبدالخالق ووزير ماليه رأسمالي بالنسبه لموضوع وزير الماليه فأنا مصمم افتي و اتكلم فيه مع أني لا أفقه شي في الاقتصاد بس عرفت بالصدفه وجود حاجه اسمها الصناديق الخاصه و ديه مدخلتش للأسف في الموازنة و الفضل يرجع للسيد الوزير المهم الصناديق الخاصه ديهفيها حوالي 1272 مليار وديون مصر 1200 مليار يعني لو استخدمنا الصناديق الخاصه هنسدد ديون مصر كلها و يبقي لنا 72 مليار نعمل بيهم اللي احنا عيزينه فأوجده رساله تانيه و بعتذر ان رسائلي كترت بس للأسف ما باليد حيله  المهم يا استاذ سمير من فضلك بطل شحاته علينا و طلع من الصناديق كفايه كلام علي ان الاقتصاد خرب وان في ازمه وبالنسبه لحكومه تعمل كل الغلطات ديه فأنا شايف ان ديه لازم و فورا تمشي مع ان الدكتور عصام شرف راجل محترم بس للأسف شخصيته ضعيفه و ميقدرش يمسك حكومه و لو رجعنا لماضيه هنلاقي انه كان طول عمره راجل الحكومه و كان عضو في لجنة السياسيات في الحزب الوطني و ده اللي قاله في حواره مع المصري اليوم في سنة 2010 و لو بصينا علي الوزراء هنلاقي ان معظمهم حزب وطني فإزاي تبقي ديه حكومة ثوره ؟

الشرطه هل يحتاجون إلي الفرصه ؟

إن علاقة الشرطه بالشعب كانت تتصدع طوال ال30 سنه الماضيه و ذلك بسبب قانون الطوارئ واحساس الضباط انهم اعلي مرتبة من الشعب و انهم قادرون علي فعل ما يريدون بالمواطن البسيط ولكن مع تزايد حالات التعذيب و القتل في اقسام الشرطه و حدوث حادثة خالد سعيد الشهيرة لم يستطيع الشعب السكوت علي قهر الشرطه له و لم يجد إلا ان يثور ضد قمع وهيمنة الشرطه التي قمعته و اهانته في بداية الثورة بل و قتلته وفي النهايه عندما فشلت في إيقاف الثوره لم تجد إلا الانسحاب وترك البلطجية ليطيحوا في الشعب و لكن الشعب وقف وعمل لجان شعبية و لكن المشكله بعد انتهاء الثورة وعودة الشرطه ان الشرطه لا تعرف كيف تتعامل إلا بالاسلوب القديم الذي يهين و يجرح كرامة المواطن كما انهم لا يروا ان هناك طريقه اخري للتعامل غير هذه والمواطن بعد الثورة لا يستطيع السكوت للضابط عندما يهينه او بتحدث معه بتعالي وايضا ضباط الشرطه قبل الثوره كان يمشي وله هيبه كبيرة وبعد الثورة كسرت هذه الهيبة و هذا بالتاكيد يجعل الضابط عنده رغبة في استعادتها فيري ان الطريقة الوحيده هي عمل كارت ارهاب للمواطن ليخافه ويحترمه مثل السابق و يري ان كارت الارهاب هذا يأتي من تعذيب و قتل مواطن في القسم او عمل انفلات امني  وجعل المواطنين يحسوا بقيمة الشرطة وهذا بالفعل ما حدث بعد الثورة لكن ايضا هناك مشكله اخري و هي وجود بعض المواطنين الذين اصبحوا ينظرون إلي تنفيذ القانون علي انه قمع واستبداد من الشرطة والذي كانوا يقبلونه من اللجان الشعبيه اوقات الثورة ممنوع علي الشرطه كل ذلك لأنهم من الشرطة ولذلك يري رجال الشرطه ان التعامل مع هؤلاء يجب ان يكون بالتعذيب والاهانه لانه لن يترك الشرطي ينفذ معه القانون باحترام و لذلك انا اسأل الاخوه المواطنون انهم كيف يحاسبون الشرطه علي عدم فتح صفحه جديده و نحن لم نترك لهم اصلا فرصه لذلك فأنا ارجوا المواطنون اتاحه الفرصه للشرطه وايضا يجب عليكم احترام القانون اما بالنسبه للشرطه فارجوا منهم تنفيذ القانون والتعامل بيد من حديد لكن باحترام و مراعاة الادميه وحقوق الإنسان في التعامل و نري إذا كان ذلك سيحل الانفلات الامني ومشاكل التعذيب القمع .

فين العيش والحرية والكرامة الإنسانية ؟

بما اننا يوم 25 يناير كنا كلنا بنهتف اننا عايزين عيش و حرية وكرامة انسانية بما ان ده كان تقريبا لاهتاف الاساسي في الثورة بعد الشعب يريد اسقاط النظام اللي انا شايف انو اللي سقط هوا قياداته بس وانما لسه اغلب النظام السابق عايش معانا و علي رأسه قيادات المؤسسة العسكرية اللي هما من النظام السابق و الرئيس السابق محمد حسني مبارك هوا اللي مختارهم و هما مش من الثوار و موضوع انهم كل منتكلم عليهم بيذلونا و يقولوا انهم حموا الثورة ومن غيرهم كانت الثورة هتفشل و انا الحقيقة عندي رأي في الموضوع ده و هوا ان القيادات لو وافقت علي ضرب المتظاهرين اللي هايحصل هو عصيان في الجيش و انقلاب علي القيادات وده طبعا لأن الجيش دول هما المجندين من الشباب اللي اكيد كان اغلبيته هينزل في الثورة لولا التجنيد و هما اكيد مش هيضربوا متظاهرين فقيادات الجيش كل اللي عملته انهم حموا نفسهم من الانقلاب نسيبنا من موضوع ان النظام لسه مسقطش علشان انا محتاج مجلدات نشرح فيها اللي باقي من النظام اللي لسه موجود نروح لموضوع العيش و دلوقتي طبعا المجلس العسكري و الحكومة دلوقتي كل اللي علي لسانهم الازمة الاقتصادية وان البلد مخزونها هيخلص و اننا بلد فقير و قي نفس الوقت لقيت تصريح علي لسان المجلس العسكري بيقول انهم بيدرسوا تمويل الاحزاب و ده طبعا لانهم نزلوا قانون تأسيس احزاب تعجيزي لكل اللي معهوش فلوس المهم بما اننا وفقا لكلام الحكومة و المجلس العسكري المتناقد بس ناخد الكلام اللي بتقال كتير و هوا اننا لو مبطلناش تظاهر واعتصام البلد هتخرب و مش هنلاقي العيش وده علي اساس ان احنا فرحانين اننا كل جمعة بناخد من وقت راحتنا و الاجازة و ننزل نتنقع في الشمس ووسط الزحمة و الحر علشان ننفذ شوية مطالب اساسية المفروض الثورة اللي هما بيحموها قامت علشانها و هما المفروض ينفذوا المطالب ديه من غير ضغط ولا حاجة بس للاسف ان التباطؤ في الاصلاح و تنفيذ اساسيات الثورة وانا اعتقد اننا لو كنا عايزين الموضوع يمشي في السيناريو ده كنا فضلنا كع مبارك و هوا كان هيصلح و يعمل كل ده مع الضغط الشعبي و بكده في سؤال يطرح نفسه وهو ايه الفرق مابين مبارك وبقايا نظامه اللي حاكمنا دلوقتي ؟؟ بس بردوا نحترم في المجلس العسكري احترامه لكرامة المصري بدليل اللي حصل قدام السفارة الإسرائيلية و تحويل المدنين لمحاكمات عسكرية بينما مبارك اللي المفروض يحاكم بتهمه الخيانة العظمي علي انه ادي اوامر للمشير بضرب المتظاهرين و ده علي حسب تصريحات المشير نفسه وانا الصراحة حاولت ادور علي اي حاجه حلوه في المجلس العسكري فقلت اسأل الناس لقيت واحد قالي الاستفتاء و الديموقراطية الي احنا فيها دلوقتي فقعدت بصيت علي موضوع الاستفتاء لقيت انهم استفتونا علي تسع مواد و بعدين عملوا اعلان دستوري ولما اتسئلوا علي فايدة الاستفتاء قالوا ان ده كان علي شرعية المجلس العسكري فرجعت للورقة اللي استفتونا فيها لقيت مفيش حاجة عن المجلس العسكري او الإعلان الدستوري و بكده يبقي المجلس العسكري محترمش العملية الديموقراطية ومينفعش دلوقتي يطالبنا احنا كمان بإحترامها و بكده يبقي في شرعية للناس اللي بتطالب بعمل دستور جديد قبل الانتخابات البرلمانية و كمان عمل الانتخابات الرئاسية قبل الرلمانية و في الاخر انا زهقت الصراحة و مش عارف اعمل ايه ولا حته عارف انظم المشاكل علشان اعمل مطالب محدده فلا اجد كلمات دلوقتي غير اللي قالها سعد زغلول و هي "مفيش فايدة".

الثورة في بيتنا

بعد ان خلصت امتحانات متعود اني كل سنه اخر يوم دراسه ده بنخرج و نلف و نعمل و تبقي خروجة محترمة يعني في جيت قبل الخروجة بيوم رحت لأمي اقولها اني عايز فلوس لقيتها بترد عليا بتقولي انو مفيش فلوس و قالتلي روح لأبوك فرحت لأبويا و قالي نفس الكلام المهم كلمه من هنا علي كلمه من هنا عرفت اخذ نصف المبلغ اللي كنت عايزه و لما قعدت مع اصحابي بعديها احكلهم علي الموقف ده لقيت ان اغلبيتهم حصل معاهم نفس الموقف ده المهم عديت الموضوع و قلت عادي بتحصل و بعدين لقيت كل شوية حد يقولي ان في كذا شركة قفلوا وكذا شركة تنين بيمشوا الناس و كل شوية بيتكلموا عن ازمة اقتصادية و الحقيقة لما فكرت لقيت ان الازمة الاقتصادية ديه جامدة لدرجة انها وصلت بيتنا و هنا قلت الجملة اللي متخيلتش اني ممكن اقولها بعد ما نزلت التحرير و اضربت و بس للأسف قلتها و هي يخربيت ديه ثورة مكنا عايشين ايام مبارك ايوة كنا بنتسرق بس كنت علي طول معايا فلوس وكان نادر لما كنا بنسمع عن شركة قفلت ولا شركة بتمشي الموظفين علشان نقص الميزانية و كمان الازمه ديه اقوي من الازمه الاقتصادية العالمية اللي حصلت في سنة 2009 لان ساعتها انا شخصيا بالمجتمع اللي كنت بتعامل معاه محسناش بأي اختلاف انما في الازمة ديه الفلوس بقيت قليلة و الحاجة اسعارها بتزيد ده حتي كيلو الطماطم بقي ب6 جنيه وكمان الحكومة بتقول ان مخزون مصر من السلع الغذائيه هيخلض كمان 5شهور و في ازمات بالفعل ابتدت تظهر في بعض السلع زي السولار و الغريب و المستفز في الموضوع هوا تعامل ابويا و امي ببرود شديد مع الموضوع لما سألتهم ليه كده قعدوا يحكولي ايام زمان و ان الطبيعي ان كل فترة كان لازم تيجي ازمة زي ديه وان بردوا كان فيه ازمة في السلع و عادي ده حتي والدي حكالي ان في فترة كان فيها ازمة سكر و مفيش في مصر سكر فكانوا بيحلوا الشاي بحلاوة المولد المهم دلوقتي في سؤال مهم جدا و هو هل الثورة هي السبب في الازمة الاقتصادية ولا الازمة كانت جايه جايه من غير ولا ثورة ولا حاجة؟ لكن من الواضح ان الازمة كانت جاية جاية من غير حاجة لأن من قبل الثورة والاعتصامات الفئوية كانت شغاة بس كانوا يقولوا اضراب الاطباء أو اضراب المعلمين و بعض الثورة بقي اسموا اضراب فئوي وده يوضح لنا ان من غير ثورة كنا بردوا هنبقي في نفس الوضع اللي احنا فيه ده .