تيار الثوره

عيش حريه عداله اجتماعيه كرامه انسانيه , هي المطالب الرئيسيه للثوره  وطبعا لابد من تيار يعبر عنها واكيد هيبقي واحد من التيارات التلاته اللي في مصر الإسلامي اللي هو في السلطه دلوقتي وبيتكلم بأسم الثورة دلوقتي او الليبرالي او اليساري  اللي هما برضوا بيتكلموا باسم الثوره  بس هو المفروض عشان اي تيار من دول يتكلم باسم الثورة يبقي بيعبر عن الاهداف الاربعه و الحقيقه ان تقريبا مفيش ولا واحد فيهم بيعبر عن الاربعه يعني مثلا التيار الإسلامي تقريبا مفيهوش ولا هدف من الاربعه وده حتي احنا شايفينه من طريقة حكمه والدستور اللي عمله اما بقي التيار الليبرالي فهو بيعبر عن الحريه لإن هي جوهر الفكر الليبرالي في الاصل وبيكفل الكرامه ولكن كعداله اجتماعيه فسياسته الاقتصاديه اللي هي حرية السوق مبتكفلش العداله الإجتماعيه اما عن اليسار فهو بيكفل العداله الإجتماعيه و الكرامه لكن مشكلته مع الحريه  وده السبب في سقوط معظم الانظمه اليساريه علي مر التاريخ , طب دلوقتي مين هيتكلم عن الثوره ومفيش ولا تيار منهم نافع  , طب احنا ليه متعملش تيار الثورة اللي يعبر عن اهدافها الاربعه ونعمله نظريات ونظام دوله مختلف حتي ممكن نبعد عن شكل الدوله المعروف اللي هو رئيس وحكومه وبرلمان ليه مناخدش مثلا حاجه من الفكر الاناركي و حاجه من نظام الدوله الفرعوني مع جزء من دولة عمر بن الخطاب وجزء من شكل الدوله الحديث ونعمل حاجه تعبر عن الثوره فعلا بدل م احنا قاعدين في قوالب فكريه  ملهاش لازمه .

دوله داخل الدوله

يعتبر ده اكثر مصطلح بنسمعه الفتره الاخيره  ويبدو ان مصر بقي جواها دول كثير اوي بدليل ان كل هيئة او مؤسسة بقيت دوله داخل الدوله  وجواها مبارك جديد ونظام بعقليه قديمه فاسده محتاجه ثورة عشان تطهره  ولكن بعد الانتخابات ولما جه مرسي كنا فاكرين ان في فكر جديد دخل في المنظومه وهيغير فعلا في العمليه او علي الاقل هيتغير مبارك اللي في كل مؤسسه ويجي مرسي إخواني صغير  لكن اللي حصل هو خيانه حقيقيه من مرسي و الإخوان بحيث انهم اتحدوا مع المباركات(جمع مبارك) الصغيرين عشان يعملوا نظام جديد زي ما تقولوا كده مزيج مع النظام القديم بصوره إخوانيه وديه تعتبر اكبر خيانه عملها الإخوان للثوره واخر ضحايا الخيانه ديه هما 60 طفل توافهم الله في حادثة قطر اسيوط  والحادثة ديه بتجرد النظام من كل اغطيته وبتورينا الحقيقه المجرده وهي ان احنا لسه قدام نفس النظام الفاسد المهمل العقيم اللي اترافع قدامه احمد زكي في فيلم ضد الحكومه سنة 1992 ولكن بإختلاف الوجوه والمره دي في كبش فداء علي عكس المره اللي فاتت اللي هو وزير النقل لكن طبعا يتحمل المسؤليه الرئيس محمد مرسي (مبارك) وفي الاخر يطلع شخص زي عصام العريان يحاول انه يتاجر بموت الاطفال وبيتباها بعصر الإخوان الديموقراطي اللي بيرموا فيه وزير نقل كبش فدا ومحدش بيتحمل مسؤليه حقيقيه وده اكبر دليل ان الإخوان لا يصلحوا لإدارة البلاد لا كفكر ولا كأفراد وده بدليل ال4 شهور حكم مرسي ولكن مين يقدر يخرج مصر من الوضع ده ؟ الله اعلم .

كريم حسن

ثورة عجيبة

امبارح مات حوالي 80 مصري فبرورسعيد في مباراة كرة قدم بين النادي الاهلي والنادي المصري و معظم اللي ماتوا كانوا من الالتراس و كل ده امام عيون الشرطة من غير ما عسكري واحد يعمل اي حاجة او يحاول يعمل حاجة و كنتيجة لده نظم الالتراس النهارده مسيرة سلمية من امام النادي الاهلي اللي في الجزيرة لحد وزارة الداخلية وطبعا اول لما قربوا عند وزارة الداخلية بدأت إعادة للحصل في شارع عيون الحرية (محمد محمود سابقا ) بس السؤال دلوقتي هو مين الغلطان ؟ نبدأ بالطرف الاول و هو الشرطة و هما من واجبهم حماية وزالاة الداخلية لكن ده لو حصل عليه اعتداء من الااصل بس هما بيعتدوا علي اي مظاهرة سلمية تقترب من وزارة الداخلية اما الطرف الثاني اللي هما المتظاهريين اللي بقالهم اكتر من سنة بيطالبوا بحقوقهم ومحافظين علي سلميتهم لكن الحقيقة والواقع الاليم ان مطالبهم و اهدافهم مبتتحققش غير لو في شهداء و ضرب و قتل و موت إنما طول ما هي سلمية مفيش حاجة سلمية يعني لو لاحظنا هنلاقي كل المطالب تحققت بعد مذابح بشعة مرعبة زي ماسبيرو و احداث محمد محمود فعلي ما اعتقد وا انا مش خبير يعني بس ده مجرد تخميين كده ان العقل الباطن للثائر بقي ميال لأنه يخلق مثل هذه المذابح بس طبعا الفكرة ديه بتحصل بعد احداث بشعه زي حادثة بورسعيد و علشان يجيبوا حق الشهداء اللي ماتوا و ملهمنش اي ذنب لازم يحصل حدث يرجع تعاطف الناس مع الثورة و نكسب الناس في صفنا وده مش هيحصل غير لو كان الثوار هما الضحية وللاسف ده الاسلوب الوحيد اللي الثورة المصرية تستطيع اتخاذه لانها موصلتش للسلطة فمش هي صاحبة القرار ولا هي ثورة مسلحة تقدر تفرض وتحقق اهدافها بقوة السلاح والعنف مع اني عندي اعتقاد اتمني يكون غلط و هو ان الصراع هيجبر الثورة انها تتبع اتجاه عنيف ولكن دلوقتي الثورة سلمية و متقدرش تحقق اهدافها غير في وضعها في خانة الضحية علشان تحقق اهداقها .

مطلوب جيفارا

مش عارف ليه حاسس ان مصر اصبحت عقيمة ومش قادره تجيب واحد عنده شخصية ثوريه قياديه تقدر تقود ثورتها العظيمة ,والحقيقه انا لاحظت اننا عندنا مليون غاندي ومفيش جيفارا واحد , الحقيقه المره ان كل الشخصيات والنخب السياسية دلوقتي عايشه في دور غاندي وده شئ مينفعش دلوقتي علشان إحنا عايزين حد ثوري بزياده وعنده شخصيه قياديه بزياده وطموح جدا لدرجة ان طموحه يسبق طموح الثورة والثوار وده شئ يفتقده كل النخب السياسيه ومثلا حد يجي يقولي ما هو مثلا ائتلاف شباب الثورة ينفع قائد , اقوله انا لا علشان اولا الائتلاف يقاد ولا يقود و برضوا يفتقد نقطة الطموح وفي شخصيات زي البرادعي مثلا لكن النوع بتاع البرادعي ده عامل زي غاندي كده ثائر هادي ديه نقطه جيده علشان بتساعد علي تحليل صح للامور بس في الوقت ده مش وقت تحليل ده وقت ثورة وغضب مش وقت تفاوض وتحليل وفي النوع بتاع حازم صلاح ابو إسماعيل وده بقي عامل فيها ثوري إنما في الاول وفي الاخر بيسعي لمطالب شخصيه  وده دائما بيحاول يعمل برباجندا كبيره وينادي بمطالب ثوريه إنما وقت الجد ينسي كلامه ويخنث عهده والناس والثوار اللي كانوا وراه هما اللي يلبسوا . وفي مشكله تانيه برضوا في موضوع القياده ديه وهي ان كل اللي عندهم شخصيات ممكن تبقي قياديه ناس كبار في السن ودول تربوا علي اسلوب اطلب 10 مطالب ولو اخذت واحد يبقي كويس إنما الجيل الحالي فهو يطلب 10 مطالب ويريد 11 واقل حاجه هي ال10 اللي طلبهم في الاول لكن للاسف هذا الجيل معندوش اي شخصيه قياديه بارزة يعني مثلا كل بتوع ائتلاف شباب الثورة لما يتكلموا يقولوا احنا شاركنا زي كل الناس في الثورة إنما مبنمسلش حد غيرنا وكذلك وائل غنيم ولغاية دلوقتي يبقي الحال كما هو عليه والثورة من غير قيادة .

صرخة جيفارا يا عبيد
في أي موطن أومكان
ما فيش بديل

اربط الحزام

انا الاول كنت هكتب الموضوع عن ليه مصر مش تونس , وان انا عرفت شوية فروق بين مصر وتون ممكن تكون السبب في الفرق اللي حصل بين الثورتين , زي مثلا تعداد السكان وان هما عددهم 12 مليون , و في سبب مهم جدا لاقيته و هو التعليم فالتعليم في تونس من اكثر النظم التعليمية تقدما  ومن اسباب كده ان التعليم مخصص ليه حوالي 22% من ميزانية تونس كلها اما في مصر فإحنا بنصرف علي التعليم 2% من ميزانية الدولة , مع العلم ان الناتج القومي لتونس اكثر من الناتج القومي لمصر بكثير . ديه كانت المعلومات اللي انا وصلتلها بسهولة لما حبيت بقي اعرف تفاصيل اكثر جبت تقرير التعليم في تونس من موقع وزارة التربية التونسيه وكان واضح وفي كل النسب وكل حاجة , اما بالنسبة لوزارة التربيه والتعليم المصريه فالحقيقة انا ملقيتش غير ارقام الطلبة والمدرسين المدارس والفصول بس وغير كدة لا شئ وكمان الحاجات ده مش محطوطة علي مستوي الجمهورية كلها إنما محطوطة كل محافظه لواحدها . المهم علشان مطولش عليكوا موصلتش للمادة الكافية اني اكتب موضوع حتي عرفت انها ممكن تكون في مركز التعبئة والاحصاء ولكن لقيت اني كنت لازم اروح اشتريها الخلاصة بقي من كل الكلام ده ان انا شايف واؤمن التعلم ده قضيه قوميه ولازم يكون هو الهدف الاول في الفترة الجاية فليه منعملش زي عبدالناصر عد النكسة لما استخدم فلوس الدولة كلها لإعادة بناء الجيش وده كان ساعتها هو الهدف وما إن الهدف دلوقتي هو التعليم يبقي نعمل زي ما عمل ونضخ الفلوس في التعليم وهات وزير عنده رؤيه للنظام التعليمي في خلال سنتين يبقي عندنا نظام تعليمي متطور وقوي واي نهضة لازم تبداء بالتعليم  و انا شايف اننا لو عملنا التجربه ديه في كل مجال من المجلالت البايظه اوي هنبقي دوله عظمة في اقل من 10 سنين وفي الاخر الله , الوطن , التعليم .

لا تصالح

لا تصالح على الدم.. حتى بدم! لا تصالح! ولو قيل رأس برأسٍ أكلُّ الرؤوس سواءٌ؟ أقلب الغريب كقلب أخيك؟! أعيناه عينا أخيك؟! وهل تتساوى يدٌ.. سيفها كان لك بيدٍ سيفها أثْكَلك؟ سيقولون: جئناك كي تحقن الدم.. جئناك. كن -يا أمير- الحكم

لا تصالح قصيده رائعه طبعا لامل دنقل الشاعر العربي الكبير و انا احب اوجه القصيده ديه للمجلس الاعلي للقوات المسلحه الصراحه ان اللي المجلس العسكري عملوا في الفتره الانتقاليه فاق اللي عمله مبارك فينا في 30 سنه علي الاقل مبارك مخلاش مدرعه تمشي تدوس علي الناس في الشارع ومبارك كان عنده حجج مقنعه مش يطلع يقول ان المدرعه كانت مسروقه وبعدين لو كانت مسروقه  ديه تبقي مصيبه تانيه نرجع لموضوعنا و مبارك كان ماشي في منهج مش عمل مثلكم ماشيين شويه علي الجنب ده و شويه علي الجنب التاني يعني ساعة الضرب قلتم ان حوالي 3 ماتوا من ضباط الجيش و بعدين وزير الإعلام يطلع بكل برود يقول اصل المذيع كان متوتر طب ديه تيجي إزاي يعني يعني انا مثلا قتلت واحد لما النيابه تحقق معايا اقلهم اصلي كنت متوتر هتخلوني اشتمكوا شتيمه وحشه مع اني محترم نيجي لحاجه تانيه و هي ان انتوا عندكم اصرار علي انها فتنه طائفيه و ده مش صح ديه فتنه سياسيه الناس اللي ماتوا كانوا مسلمين و مسيحين الفتنه ضد المجلس العسكري  و إعلامه الفاسد و حكومته الضعيفه اللي مفيهمش غير الدكر الوحيد اللي استقال و هو حازم الببلاوي و انا احترمته جدا بعد موقفه ده و في الاخر احب اقول للمجلس العسكري و علي رائسه طنطاوي اللي عملها مره يعملها تاني يا طنطاوي و اتعلم من اللي قابليك بس انت خلاص متعلمتش و جبت اخرك معانا هنعملها تاني و انت المسؤول  

التعليم هو الاساس

طبعا كل الناس كارهه ايام الملكيه علشان الفساد وعدم وجود حريات وكل ده انما لو بصينا للملكيه من ناحية التعليم هنلاقي انها كانت فتره راقيه ومتميزه في التعليم حتي اللي كانوا بيمسكوا وزارة المعارف (اللي هي زي التربيه والتعليم عندنا دلوقتي) كانوا ناس ادباء و مثقفين زي مثلا طه حسين وعلي مبارك وكذلك ابو الليبراليه في مصر سعد زغلول وايضا احمد لطفي السيد و هو اول من ترجم لارسطو و ده اثر علي التعليم لأن كلهم كانوا ناس ليهم رؤيه في التعليم و طوروا و ده عمل اذدهار في المستوي الثقافي و العلمي للمصريين المتعلمين و الفتره ده كان فيها نهضه في الفنون ولكن وزراء التعليم بعد ثورة 23 يوليو كلهم لم يملكوا رؤيه محدده لتطوير التعليم و كان كل ما يؤهلهم ان بعضهم كان معاهم دكتوراه و لكن كلهم كان يميزهم ولائهم للنظام و كمان اللي منع اننا نشوف ناتج عصر التعليم الجميل هو سياسات نظام عبدالناصر واللي جم بعده منعت ظهور و كلام اي حد مش مؤيد لنظام عبدالناصر وطبعا معظم الناس المفكرين و اللي عندهم رؤيه ضد الحكم العسكري اللي فضلنا تحت رحمته 60 سنه و اكبر مثال لكده هو وزير من وزراء التعليم في عهد عبد الناصر قال رأي مختلف عن رأي عبدالناصر في اجتماع و بعد الاجتماع بيوم فقد منصبه والموقف ده يوضح ان اللي احنما وصلناله النهارده من فقر وجهل واميه وفساد مش محصلش نتيجة 30 سنه من حكم شخص واحد ولا حتي 60 سنه من حكم نفس النظام المشكله ان النظام مع وجود وزراء جواه انما اغلبهم يا إما مبيفهمش و اللي بيفهم فيهم ميقدرش ياخد الحريه في التصرف في اختصاصات منصبه لو في اختلاف في الرأي مع الشخص المنفرد في الحكم وده مكنش موجود ايام الملكيه ومش معني كده ان انا مع الملكيه  وضد ثورة 23 يوليو بالعكس انا ضد الملكيه قلبا وقالبا انما ده ميمنعش ان كان فيها حاجات كويسه وكمان انا ناصري جدا بس ده ميمنعش اني اشوف حاجه حاجه وحشه في عبدالناصر ونظامه  وبرضو ميمنعش اني شايف ان سياسات عبدالناصر في بعض الحاجات هي اللي عملت واحد زي المخلوع  و وصلتنا اننا نعمل ثوره ضده  علي فكره اني اقبل النقض في حاجه انا مؤمن بيها ده شئ متعلمتوش في المدرسه ومن نظام التعليم التعليم الحالي اللي مينفعش يبقي تعليم للناس متحضره انما انا اتعلمت ده من الثوره وفي ميدان التحرير ونفسي الناس اللي مسؤلين عن التعليم يفهموا العبره من ده و نتعلم بيها و نفسي نرجع للزمن اللي المثقفين و اللي عندهم رؤيه يمسكوا التعليم .

إرضي بقليلك

طول عمري نفسي افهم القناعه بالظروف اللي المصريين عايشين بيها و حتي اللي انا كنت عايش بيها و ملقتش تفسير للموضوع ده غير كلمة "إرضي بقليلك"  كلمه ديه مبدأ مشيعليه ناس كتير و للأسف كلهم عاشوا مش مبسوطين و تعساء علشان محدش فيهم بيطلب اللي هو عايزه وبيقطنع باللي بياخده مهما كان قليل و مبيجبلوش حتي ابسط حقوقه و علشان في ناس من حوالي 60 سنه في ناس فهموا الموضوع ده واستخدموا الموضوع ده علشان ياخدوا من المصري ابسط حقوقه و يقمعوه و طبعا في ناس عرفوا يستخدموا ده في خدمة البلد من وجهة نظرهم انما في ناس اللي عملوه ميخدمش البلد ولا اي حد من اي وجهة نظر غير نفسهم زي مبارك ورجالته و في ناس استغلوا ده علشان يسرقوا عرق المصري زي رب عمل يشغل الموظف بتاعه بال18 ساعه في اليوم و يديلوا 100 جنيه مثلا او مدرس يشرح للطلبه ميشرحش للطلبه غير نص الدرس علشان ياخدوا معاه درس و اللي ميخدش معاه ويسألوا مشرحتش الباقي ليه يقولوا كويس ان انا بشرحلك اصلا ولو مش عاجبك خد درس او موظف بياخد رشوه علشان يديك حقك وانت ساكت و ... و ..... و .... ولو علي الامثله مش هتخلص بس علي فكره اللي بيرضي بقليلوا دايما بيبقي مذلول بالقليل اللي خدوا لكن انا خلاص مش هرضي بقليلي تاني و هاخد حقي كامل و هعمل اللي عليا كامل كمان و علي فكره اللي بيرضي بقليلوا ده دايما غلبان و ضعيف ومذلول والمصري مش كده ولا عمره ما كان كده ممكن يكون في فتره ضعف و سكت علي حقه لكنه في الاخر بيثور علي الظلم و بياخد حقه كامل و علي فكره احنا خلاص اعلمنا نتكلم إزاي ومش هنسكت تاني و لو حد حاول يظلمنا تاني هنوريه احنا بنتكلم إزاي و اكتر من الكلام كمان و لكم في مبارك عبره .

أشكرك يا إسرائيل

بالفعل أشكرك يا إسرائيل مع انك عدوي الاول , مع انك لست اكثر من نمله استطيع دهسها بسهوله , اشكرك يا إسرائيل علي وحدتنا فبعد ان كنا في حاله من الفرقه عدنا ايد واحده في وجهه المعتدي , إن ضرب إسرائيل للحدود كان اشبه بنداء الإستيقاظ الذي افاقنا من الغمه الذي كنا فيها فبعد ان كنا في اشد حالات الفرقه ,اجتمعنا كلنا كيد واحده يجمعنا حبنا للوطن وكرهنا لإسرائيل , طبعا هناك إختلاف وحيد بين الناس الان فهناك من يشك ان كل هذا مجرد تمثيليه لينقض المجلس العسكري علي الحكم و هناك من يقول ان هذا بسبب الثوره وقرب تسليم السلطه إلي هيئه مدنيه و بدايه حكم ديموقراطي في مصر و هو ما تتخوف منه إسرائيل و ايضا هناك بعض الجوانب السلبيه مثل عرقلة المحاكمات و عرقلة مسار الثوره لكن كل هذا يعد بلا اهميه بجانب وحدتنا

هل يزور المجلس العسكري الإنتخابات ؟

طبعا ده سؤال غريب جدا و ليه يعمل كده ؟ بس ممكن نقول علشان الإسلامين او علشان يسيطر علي مجلس الشعب اللي جاي و علي الدستور اللي جاي علشان يزود دور القوات المسلحه في الدوله و السياسه خصوصا ان في كلام اتكتب في الموضوع ده و ان كان في خلاف بين المشير طنطاوي و الرئيس المخلوع علي النقطه ديه اما بالنسبه لشواهد الوضوع ده فهي انه المجلس العسكري يرفض تماما فكرة تطهير القضاء و بذلك اللي هيشرف علي الإنتخابات اللي جايه هم نفس القضاه الذين زوروا الإنتخابات في العصر البائد مع اني اعتقد اننا ما زلنا في هذا العصر بل عصر اوحش كمان و الدليل محاكمه المدنين امام القضاء العسكري واخرهم اسماء محفوظ وكمان الحكم دلوقتي عسكري مش مدني و المجلس بيتعامل مع الشعب بصفته العسكريه و علشان مع ان السياسين عنما ينتقدوا المجلس يبنقدوه بصفته ىالسياسيه المدنيه لكن المجلس العسكري للاسف لا يفصل بين الصفتين لذلك عندما يتم انتقاده بعتبر هذا نقدا للموئسسه العسكريه كامله ولكن كيف نقنع المجلس بالفصل بين صفتيه ؟ هذا هو السؤال .